«Feve necesita trenes dignos del sieglu XXI»

0
672

Isidro Martínez Oblanca refugó esti martes el plan de Fomentu de reforzar les cercaníes Feve con trenes de segunda mano. El candidatu de Foru al Congresu de los Diputaos considera que les declaraciones del conseyeru Juan Cofiño son «unu escurrimientu» y una semeya de l’Asturies decadente que se conforma con llimosnes». Ye la respuesta del candidatu forista a les informaciones del diariu El Comercio qu’aseguren que la rede de vía estrecha asturiana va reforzase con trenes de segunda. L’oxetivu ye desaniciar, de forma temporal, los defectos que presenta anguaño’l serviciu, frutu de continues cancelaciones por falta de maquinaria y repuestos.

Oblanca cree qu’el 2018 foi «un añu perdíu pa les infraestructures d’Asturies». El candidatu llamenta que’l serviciu de l’antigua Feve quedara «abandonáu a la so suerte» y sufra «una situación tan insostenible como intolerable». Los servicios de la compañía ferroviaria perdieron dos tercios del total de pasaxeros nos caberos 15 años, con unes perdes envaloraes de más de 200 millones d’euros al añu.

Pa Oblanca l’alquisición de maquinaria de segunda mano «ye una tomadura de pelo y una midida absurda» per parte d’un gobiernu «inoperante». El candidatu de la coalición PP-Foru defendió que «Asturies tien de tener el mesmu trato que’l restu d’España en materia ferroviario» y llamentó que «tamién en Cercaníes los socialistes afaen a Asturies nel vagón de cola d’España». «Les cercaníes precisen modernizar la rede y poner trenes dignos del sieglu XXI”, remató.