Una muyer finó y otra resultó mancada nun accidente de tráficu, ente trés coches, nel AS-117, al altor de Blimea en Samartín del Rei Aurelio. Según los datos facilitaos pol Serviciu d’Atención Médica Urxente (SAMU) la muyer, que foi treslladada al Hospital Universitariu Central d’Asturies (HUCA) na UVI Móvil de la zona, presenta un pronósticu reserváu por cuenta de más pruebes y hasta nueva valoración médica.
El Centru de Coordinación d’Emerxencies recibió l’avisu a les 11:54 hores. Na llamada indicóse que trés vehículos topetaren y había persones nel so interior. De momentu movilizóse al Xefe de Zona Centro y a 11 efectivos de Bomberos del Serviciu d’Emerxencies del Principáu d’Asturies (SEPA) de los parques de Samartín del Rei Aurelio, Mieres y Llamorgal.
Una vegada na zona, los bomberos escarcelaron a la ocupante d’unu de los turismos accidentaos. Pa ello cortaron la pilastra central y retiraron les puertes del llau del conductor pa la so estracción, tres inmovilizala asitiándo-y un collarín. Tres la pertinente autorización tamién escarcelaron el cuerpu ensin vida de la muyer finada que circulaba n’otru vehículu. Los efectivos de bomberos tamién realizaron xeres de llimpieza de la calzada con un absorbente d’aceite.
