Una persona finó tres quedar atrapada, en circunstancies que se desconocen, por un brazu hidráulicu nun tractor col que taba moviendo tierra na localidá de Fuexu, en Tinéu.
Según los datos facilitaos pol Serviciu d’Atención Médica Urxente (SAMU) el fináu ye un varón de 54 años d’edá. Los servicios sanitarios movíos al llugar, equipu d’Atención Primaria de Tinéu y ambulancia de soporte vital básicu, namás pudieron confirmar el so fallecimientu. Hasta l’incidente tamién se movió l’helicópteru medicalizáu de Bomberos d’Asturies y el Grupu de Rescate del que forma parte una médica-rescatadora.
Los restos mortales del fináu fueron escarcelaos por efectivos de Bomberos del Serviciu d’Emerxencies del Principáu d’Asturies (SEPA) con base nel parque tinetense. Los bomberos tuvieron que cortar parte de la estructura del tractor pa poder lliberar a la víctima.
El Centru de Coordinación d’Emerxencies del 112 Asturies recibió l’avisu a les 12.20 hores. Na llamada indicaben qu’habíen una persona atrapada por un tractor, pola pinza d’una retro, na citada localidá.
La Sala 112 del SEPA movilizó una dotación de bomberes del parque tinetense y al Grupu de Rescate col helicópteru del SEPA. Paralelamente pasóse l’avisu al SAMU qu’unvió los medios citaos y tamién activó al equipu médicu de la UVI-móvil de Cangas que nun llegó a intervenir en confirmándose el fallecimientu del mancáu. L’accidente púnxose en conocencia de la Guardia Civil y de la Policía Local.
