La plataforma lliteraria Formientu vuelve ampliar el so festival cultural fechu dende casa entamáu coincidiendo col aisllamientu de la población pola mor del andanciu de coronavirus. El festival online, unu de los más estensos de los celebraos en toa Europa, suma más de 80.000 espectadores nos dos meses d’actividá y más de 60 actividaes programaes ente conciertos, recitales, charres, alcuentros y talleres col asturianu como llingua vehicular y la cultura asturiana como protagonista.

“Magar que la sociedá asturiana yá ta relaxando les condiciones del acorriapamientu paecíanos polos testimonios que mos lleguen que sigue siendo importante tar ehí ufriendo un escaparate pa la cultura asturiana”, esplica Inaciu Galán, coordinador d’esti festival xunto a Diego Solís. Pa Galán “esti festival demuestra la potencia de la cultura asturiana y la so xenerosidá cola sociedá nun momentu difícil”. “Hai que recordar que ye un festival nel que más de sesenta artistes de toles disciplines collaboraron de forma desinteresada pa ufrir a la sociedá una ufierta cultural completa a lo llargo d’estos díes tán complicaos”.

«Esti festival demuestra la potencia de la cultura asturiana y la so xenerosidá cola sociedá nun momentu difícil”

Rematada esti domingu 3 la tercer fola del festival, esti llunes arranca la cuarta fola con un recital lliterariu de la escritora María Esther García López. El martes 5 Daniel Lobete, va abrir el festival a la participación cántabra cola charra El cántabru: situación y perspectives del asturllionés en Cantabria. Tres el pasu de dos llioneses pel festival n’anteriores foles, Tiégui Alves vendrá’l sábadu 9 pa falar de la situación del mirandés en Portugal.

El miércoles 6 Xosé Fdez. Estrada, directivu del equipu Unión Club Ciares va ufrir la charra La mayoría del fútbol. El xueves 7, l’hestoriador y responsable del Serviciu de Normalización Llingüística de Corvera, Rafa R. Valdés va falar de los proyectos lliterarios que desarrolla na so oficina de normalización. 

El vienres 8, Día de les Lletres Asturianes (en circunstancies normales), y a les 17 hores, pa evitar coincidir colos actos virtuales reivindicativos qu’entamen delles entidaes, va celebrase una presentación del curtiumetraxe L’últimu aliendu, per parte d’Humber, del grupu Misiva, que participa nel mesmu. 

Toles charres van poder vese a les siete la tarde en Facebook

El domingu 10 el doctor ya investigador del Equipu d’Otín, Xurde Menéndez Caravia, va falar de la divulgación ciéntifica n’asturianu: claves pal futuru. Del llunes 11 al miércoles 13 habrá espaciu pa la música y la tradición dende distintes perspectives: Andrea Joglar, el llunes; Xosé Ambás y Ramsés Ilesies, el martes; y Diego Castañón, cola charra El rap n’Asturies, el miércoles.

El xueves 14, el cineasta Pablo A. Quiroga va dar una charra-taller sobre’l guión nel curtiumetraxe asturianu. El vienres, sedrá’l turnu del músicu y artesanu Illán Escalada, que va falar del futuru de la música asturiana. El sábadu 16, la mocísima poeta Alma Hidalgo va dar un recital. Y el domingu 17, pa poner el ramu a más de 60 díes del #FormientuEnCasaFest, los sos responsables, Diego Solís & Inaciu Galán, van tener un diálogu pa facer balance del mesmu y abrir interrogantes y facer propuestes de futuru no que cinca a la industria cultural asturiana. 

Toles charres van poder vese a les siete la tarde na páxina de Formientu en Facebook.