El secretariu xeneral de FORO Asturies y diputáu na Xunta Xeneral, Adrián Pumares, treslladó güei la decisión de la Comisión Directiva de FORO Asturies de refugar cualquier tipu de coalición electoral y de nun participar nes eleiciones xenerales del 23 de xunetu, anque anunció, sicasí, “la creación d’un Observatoriu pa fiscalizar el llabor de los diputaos y senadores asturianos, con especial atención a los del partíu que gobierne”.
“L’actual situación de polarización política y la Llei D’Hont faen mui difícil que FORO Asturies pueda llograr representación nel Congresu de los Diputaos, pero al traviés d’esti Observatoriu’l nuesu partíu va analizar mensualmente’l trabayu realizáu polos diputaos y senadores asturianos, y va facer propuestes en defensa de los intereses d’Asturies”, aseguró’l secretariu forista.
Pumares, quien reconoció abiertamente que “rescampla que cola resultancia electoral del 28 de mayu nun algamemos l’oxetivu de ser tan decisivos como queríamos”, alvirtió tamién
de que “la nuesa presencia nel Parlamentu puede marcar la diferencia ya influyir p’ameyorar día ente día la vida de los asturianos”. “Voi dexar la piel pa influyir nel Gobiernu d’Asturies: en cada midida, en cada Llei y en cada Presupuestu”, aprofió. El voceru de FORO Asturies esplicó que “precisamente cumpliendo esi oxetivu de ser decisivos, la xera agora ye sumar el mayor númberu d’alcaldíes posibles y formar parte de los gobiernos municipales, lo que va depender de cada conceyu ensin imposiciones per parte de la dirección del partíu”.
Pumares concluyó que “xunto con una fonda reorganización nel partíu que dexe avanzar
na espansión territorial de FORO Asturies y ameyorar na comunicación con militantes y simpatizantes, comprometo a, antes de rematar l’añu, celebrar una convención qu’afite les bases del nuesu trabayu mientres los próximos cuatro años”.
