Dende Hostelería Con Conciencia alcen la voz y vuélvense a movilizar pa esixir respuestes y soluciones urxentes para poder mitigar les consecuencies que’l zarru de la hostelería nesta segunda fola ta produciendo nos sos negocios. Afirmen que más de 27.000 puestos de trabayu directos namá n’Asturies apeligren en casu de nun llegar estes midíes.
Dafechu conscientes de la delicada situación sanitaria, nun reclamen l’apertura de los sos negocios pa evitar les situaciones de riesgu y controlar la pandemia. Magar ello, y desmarcándose de la patronal sí qu’esixen que se-yos tome en cuenta como un sector gravemente afectáu pidiendo sofitu real dende los trés niveles de l’Alministración: local, autonómica y estatal.
Énte’l desamparu y l’incertidume que xenera’l decretu de zarru, espunxeron les sos necesidaes y esixencies al Congresu de los Diputaos, al Gobiernu del Principáu d’Asturies y a los distintos Ayuntamientos, según les sos competencies. Precisen acciones urxentes y un plan de choque suficiente pa garantizar la supervivencia antes d’una posible llegada de la tercer fola.
Nestos díes, y de manera pacífica cola autorización de la Delegación del Gobiernu, tán llevando a cabo caravanes de coches y protestes en diversos puntos de la ciudá protestando pola angustiosa situación.
Nun recién comunicáu oficial espliquen el so sentir y concreten los sos pidimientos en midíes como exoneraciones, lexislaciones y ayudes reales.
