El Gobiernu d’Asturies va encargar la realización d’un estudiu sobre la prostitución y trata con fines d’esplotación sexual, anunció María Jesús Álvarez, directora xeneral d’Igualdá. Álvarez participó na primer xunta d’esta llexislatura de la mesa técnica constituyida coles mires de erradicar estes práctiques.
L’Executivu autonómicu presentó en marzu la Estratexa asturiana pa l’abolición de la prostitución y trata con fines d’esplotación sexual. L’oxetivu ye qu’Asturies seya pionera nesta materia. Álvarez aportunó nesi fin: “El Principáu ye una comunidá precursora nel abordaxe de la trata y la prostitución. Tamos énte un trabayu apasionante pa facer d’Asturies una comunidá abolicionista, porque una sociedá qu’esplota a les muyeres d’esta manera nun ye una sociedá decente”.
“Tenemos que dar pasos decidíos nel cumplimientu de la estratexa”, sorrayó la directora d’Igualdá. El primeru d’ellos va consistir, precisamente, en realizar una investigación que dexe conocer la demanda de la prostitución y el nivel d’adecuación de los recursos esistentes (públicos y privaos) p’atender a les víctimes, según les sos demandes o necesidaes.
“Nun ye una cuestión cenciella porque hai un nivel de tapecimientu importante, y pa eso vamos ellaborar un mapa de la situación na comunidá autónoma”, alvirtió Álvarez. “Trátase de conocer la dimensión d’esti tipu de violencia nuna triple aguada: numbérica, xeográfica y les característiques sociodemográficas de les muyeres víctimes”.
El gobiernu tamién pretende precisar y estudiar la situación psicosocial de les muyeres víctimes que definan la so vivencia y les sos necesidaes, mires y demandes. Pa ello plantégase que l’equipu investigador, dada la complexidá de la materia, incluya profesionales de la socioloxía, psicoloxía, trabayu social y mediación intercultural.
El Gobiernu d’Asturies plantegó la constitución d’un grupu d’estudios que facilite l’accesu d’esti equipu investigador a les fontes d’información requeríes y a los interlocutores o informantes clave. Sería l’encargáu, amás, de velar pola realización afayadiza de les entrevistes coles víctimes.
“El diagnósticu ye fundamental p’afinar bien nes polítiques que pongamos en marcha y que puedan ser útiles pa estes muyeres y pal conxuntu de la sociedá. Precisamos tener una percepción real. Nel gobiernu tamos totalmente decidíos a encetar la estratexa na so integridá y arreyar al conxuntu de la sociedá nesta xera”, añedió Álvarez.
