La Conseyería d’Industria, Empléu y Promoción Económica convoca la llinia d’ayudes autonómiques pal usu d’enerxíes anovables y p’acciones d’aforru y eficiencia enerxética, que cunta con un presupuestu de 1,65 millones.
Esta convocatoria, financiada con fondos propios del Principáu, va dirixida a empreses privaes, trabayadores autónomos, particulares, entidaes ensin ánimu d’arriquecimientu y comunidaes de propietarios que realicen, nel ámbitu territorial de la comunidá, inversiones n’anovables o empobinaes a promover l’aforru y l’eficiencia enerxética.
Nesti sen, incentívase l’usu de biomasa como combustible pa la producción d’enerxía térmica (por aciu la sustitución de calderes), la producción d’enerxía eléctrica al traviés de turbinas minihidráulicas o aerogeneradores, sistemes geotérmicos destinaos a la producción d’enerxía térmica (calor o fríu), l’aprovechamientu de biogás y la instalación d’estaciones d’abastecimientu de combustibles alternativos accesibles al públicu.
El plazu de presentación de solicitúes va tar abiertu a partir de mañana y mientres un mes. Les actuaciones subvencionables tienen d’executase o executase ente’l 13 d’agostu de 2022 y el 1 de payares de 2023.
El Principáu convoca añalmente esti tipu d’ayudes, con un altu grau d’execución. Asina, dende 2017 a 2022 subvencionáronse 437 actuaciones, con subvenciones per valor de 6,67 millones, que movilizaron 35,93 millones d’inversión per parte d’empreses y particulares.
En concretu, l’añu pasáu sofitáronse 62 actuaciones en biomasa, instalación p’aprovechamientu enerxéticu de biogás, midíes nel sector de la edificación, industries y estaciones de repostaxe de combustibles alternativos accesibles al públicu. Estos proyectos recibieron 1,6 millones n’ayudes y xeneraron una inversión global de 9.500.000 euros. Bayer, Zitrón, Fuensanta, Joluvi o’l Sanatoriu Marítimu de Xixón figuren ente les entidaes que recibieron ayudes en 2022.
La Conseyería d’Industria confía en que la nueva convocatoria espierte gran interés y amuese resultancies equivalentes al restu de llínees abiertes nestos momentos. Por casu, pa la convocatoria d’ayudes a actuaciones d’eficiencia enerxética en pymes y grandes empreses del sector industrial solicitóse una ampliación de fondos de 20 millones, hasta algamar un total de 62.
