La Conseyería d’Industria, Empléu y Promoción Económica va destinar 200.000 euros al nuevu Plan Renove de sustitución de calderes y calentadores de gas natural o que funcionen con gases licuaos del petróleu. La cifra supon el 17,67% más que’l pasáu añu.
La convocatoria de les ayudes foi presentada güei pol director xeneral d’Industria, Juan Carlos Aguilera, quien tuvo acompañáu del presidente de Afoncasa, Luis Nevares, y de la vicepresidenta de Asinas, Ana García Arenas. Afoncasa y Asinas son les asociaciones empresariales d’instaladores encargaes de la tramitación de les subvenciones.
Les ayudes, que yá van poder solicitase dende mañana miércoles, van dirixíes a toles persones físiques que deseyen camudar una caldera o calentador a gas con más de 12 años d’antigüedá y que nun cunte con dispositivu antirrevocu o s’acredite abondo qu’esisten condiciones de riesgu por aciu un informe d’un instalador autorizáu.
La convocatoria tamién cubre la sustitución de calderes y calentadores de segundes viviendes, siempres y cuando tean allugaes n’Asturies. La documentación, los requisitos y los trámites pa solicitar les ayudes pueden consultase nes páxines de Asinas (http://www.asinas.org) y de Afoncasa (http://www.afoncasa.org).
Acordies coles estimaciones del director xeneral d’Industria, con estes ayudes preve la sustitución de más de 400 calderes o calentadores na rexón por equipos más seguros, más eficientes dende’l puntu de vista enerxéticu y menos contaminantes.
Aguilera señaló que la subvención a cada beneficiariu bazcuya ente un mínimu de 300 euros y un máximu de 450 y recordó qu’esta convocatoria tien polo xeneral una bona acoyida polos usuarios y suel escosar presupuestu. Ello ye que dende l’añu 2009 son yá cerca de 5.000 les ayudes concedíes, o lo que ye lo mesmo, casi 5.000 equipos
sustituyíos.
