La organización ufierta de manera gratuita y a costu cero pal erariu públicu un cursu pa tolos y toles diputaes de la Cámara.

Iniciativa pol Asturianu considera “absurdu” l’alderique sobre l’usu de la llingua asturiana nel Parlamentu asturianu. La organización apunta que “tan buscándose soluciones a un problema que nun esiste y al mesmu tiempu se ta cayendo nuna trampa pa politizar la llingua asturiana”.

La entidá denuncia que’l restu de partíos nun pueden caer na falacia de qu’un diputáu diga que nun entiende l’asturianu. Por ello, una reforma del reglamentu nun puede basase nuna mentira.La organización reclama aclarar la situación y pensar si “de verdá creen que la sociedá asturiana piensa que nun entienden l’asturianu. ¿Consideren de verdá que la sociedá va creer esa mentira cuando l’asturianu y el castellán son plenamente intelixibles?”.

Dende l’añu 1991 ta presente l’usu del asturianu por diferentes diputaos con normalidá na Xunta Xeneral, ensin problemes y agora la institución tendría qu’articular l’usu en base a la llibertá y non en base a una discriminación pa poder exercer la xera propia de l’actividá parlamentaria
según lo que recueye la Constitución nel artículo 23.2.

Iniciativa pol Asturianu encamienta a los partíos que defienden la oficialidá a “dar un pasu allantre y frenar los intentos de Vox pa torgar los drechos de los y les falantes d’asturianu. Ye’l turnu de la mayoría a favor de la llibertá y de la diversidá. Esa mayoría nun puede dar pesu y
poder a les discriminaciones y a les mentires”.

La organización tamién reclama que “la mayoría parlamentaria a favor de la oficialidá seya valiente y trabaye en pro de la llibertá y se ponga a trabayar en serio nuna reforma que garantice la plena igualdá de los drechos llingüísticos sumando al mayor número de votos favorables posibles que ye lo que reclama la sociedá y que recueye la Constitución Española nel so artículo
3.2”.

Pa terminar, la entidá recuerda que la so propuesta d’ufiertar de manera gratuita y a costu cero un cursu d’asturianu pa tolos diputaos y diputaes y trabayadores de la Cámara sigue enriba de la mesa. Una propuesta que nun supondría nengún gastu pal erariu públicu y col que la organización quier que los representantes políticos de tolos asturianos y asturianes s’animen a usar l’asturianu.