Iniciativa pol Asturianu reclama al Conceyu de Siero qu’aproveche’l remocique de la páxina web municipal pa dotala d’una mayor presencia del asturianu. L’equipu de gobiernu sacó a concursu públicu a finales del añu pasáu’l contratu pa rediseñar el portal web. El conceyal de Facienda y Xestión Económica, Alberto Pajares, anunció’l vienres l’axudicación del contratu.
La nueva páxina va desendolcase a lo llargo de los próximos siete meses. Por mor d’ello, la organización reclama al Conceyu qu’aproveche’l rediseñu p’ameyorar la presencia del idioma nel portal web, permitiendo d’esta manera visibilizar y normalizar l’asturianu nesta canal de comunicación cola ciudadanía. Nesti sen, l’asociación recuerda que’l conceyu cunta con un Serviciu de Normalización Llingüística en funcionamientu, polo que la torna de los conteníos nun va suponer un encarecimientu del proyectu.
La organización afala tamién al Conceyu a aprovechar esti procesu pa incorporar la toponimia oficial de Siero en tol portal web, d’alcuerdu colo qu’establez el Decretu 104/2009, de 29 de xunetu, pol que se determinen los topónimos oficiales del conceyu.
