La organización entamó una ronda de contactos coles formaciones que participen nel procesu de negociación

Iniciativa pol Asturianu entamó una ronda de contactos con representantes de les diferentes fuercies polítiques que participen nel procesu de reforma del Estatutu d’Autonomía d’Asturies. El presidente de la entidá, Iván Llera, aprovechó estos alcuentros pa treslladar a les formaciones la necesidá de trabayar con enfotu y altor de mires nestes conversaciones: «Tamos nel momentu más importante pal idioma en munchos años. La ciudadanía merez un debate seriu, con sentíu común y con altor de mires p’algamar la oficialidá de les nuestres llingües”.

El presidente de la organización comentó que “ye un deber moral iguar una situación de falta de drechos de la ciudadanía asturfalante. Iguar esa situación depende de tolos representantes de la Xunta Xeneral. Facemos un llamáu a los partíos qu’arrenuncien a la oficialidá a entender que reconocer los drechos llingüísticos al traviés de la oficialidá ye trabayar pola llibertá y pola pluralidá”.

Amás, Llera apuntó que “nun podemos entender cómo ye posible defender la oficialidá de diferentes llingües n’otres partes d’España y equí oponese. Dende Iniciativa pol Asturianu reclamamos coherencia y tar al altor de lo que reclama la sociedá d’esta reforma y sumar y trabayar en positivu”. El presidente d’Iniciativa pol Asturianu terminó diciendo que “ye necesario que nesti debate sobre la oficialidá toles fuercies y representantes faigan por entendese, aprovechar esta coyuntura histórica y sentir a la sociedá”.

La ronda de conversaciones arrancó col secretariu xeneral de Podemos, Daniel Ripa, y continuó con Álvaro Queipo, del PP, ya Adrián Pumares, de Foru Asturies. Los conceyos van siguir esta selmana con representantes d’Izquierda Xunida. La FSA-PSOE tovía nun confirmó la fecha na que se va celebrar esi alcuentru.