La organización afea la supresión del idioma billingüe nes fueyes d’inscripción
Iniciativa pol Asturianu reclamó al Conceyu de Tinéu, gobernáu pol PP col sofitu de VOX, que recupere la llingua asturiana dientro de los formularios de solicitú de matrícula de la Escuela Municipal de Música, «que dende va años taben disponibles al empar n’asturianu y en castellán», espliquen dende la organización. Hasta agora les dos llingües veníen conviviendo n’harmonía y ensin nengún tipu de conflictu nin quexa per parte de los escolinos, trabayadores municipales o miembros de la comunidá educativa.
Les instancies d’angüaño, disponibles na páxina web, suprimen la presencia de la llingua asturiana. D’esta forma’l Conceyu da un pasu atrás na normalización del asturianu, eliminando una torna fecha pola técnica responsable del Serviciu de Normalización Llingüística.
Pa la organización de reivindicación llingüística esta decisión «ye incomprensible y supón un pilancu na normalización social del asturianu». L’asociación considera que la omisión del usu del asturianu nesta documentación ye contraria a la Llei d’Usu y Promoción del asturianu aprobada por el Partíu Popular, que gobierna nel Conceyu, nel añu 1998. «Nun se xustifica presumir d’aprobar la Llei d’Usu al mesmu tiempu que se dan pasos atrás na presencia normal, voluntaria y harmoniosa de la llingua asturiana nun documentu bilingüe», argumenten dende Iniciativa pol Asturianu.
Por esta razón, lniciativa pol Asturianu fixo llegar esta quexa al Conceyu de Tinéu y al Partíu Popular d’Asturies pa esixir una rectificación y recuperar la presencia normal del idioma na documentación. “Ye’l momentu de demostrar la defensa de la llexislación vixente, de la llibertá y del cambéu d’actitú del PP en rellación a les llingües d’Asturies”.
