La investigadora Bárbara Biagioli fixo’l so Trabayu de Fin de Grau sobre la llingua asturiana y gracies a esi trabayu, graduóse en Mediación Llingüística na Universidá de Siena. Dempués d’esta bona noticia y tres apaecer en dellos medios de comunicación recibió estos díes nes sos cuentes personales en diferentes redes sociales dellos mensaxes con ataques y amenaces.
Iniciativa pol Asturianu quixo treslladar a Bárbara Biagioli «el sofitu de la nuesa organización y la conderga de tolos ataques que recibiera al traviés de mensaxes en redes sociales únicamente por facer un trabayu d’investigación científica al rodiu del idioma y dar una opinión científica».
Por suerte, espliquen dende la dirección d’Iniciativa pol Asturianu «estes actitúes escontra l’idioma de toos y toes los que vivimos n’Asturies son mínimes na sociedá asturiana que quier convivir n’harmonía y llibertá llingüística, ensin esclusiones de nengún tipu, a nadie d’equí nin d’otru territoriu. La sociedá asturiana ye una sociedá integradora, diversa, plural, non escluyente y que quier cuidar el so patrimonio llingüísticu ensin conflictos».
Iniciativa pol Asturianu quixo amás felicitar a la italiana Bárbara Biagioli pol so trabayu, «por esi cariñu al nuesu idioma, por colaborar a esa dignificación tan necesaria pa la nuesa llingua y tresllada-y el cariñu y el sofitu de tola organización por esos ataques. Estes mínimes actitúes amuesen que tovía queda por facer munchu trabayu y muncha didáctica por facer pa espardir la sensibilidá y diversidá llingüística».
