Los axentes del Mediu Natural del Principáu d’Asturies y el Serviciu de Protección a la Naturaleza (Seprona) de la Guardia Civil investiguen l’apaición de los restos d’un osu pardu na localidá somedana d’El Ḷḷamardal
El descubrimientu producióse por azar. Una muyer avisó al 112 el 1 de xineru al alvertir qu’un perru llevaba na so boca una pata d’osu. Nel momentu, los axentes del Principáu activaron el protocolu y rastrexaron la zona. Los restos –una pata delantera, otra trasera y parte de la columna y el costillar- fueron alcontraos a otru día.
El Centru de Recuperación de la Fauna Selvaxe de Sobrescobiu va encargase de realizar los estudios correspondientes pa intentar pescudar les causes de la muerte del animal.
