La empresa pública Inspección Técnica de Vehículo Asturies (Itvasa) publicó na canal d’empléu de la so web dellos procesos de selección pa contratar indefinidamente a 44 nuevos trabayadores, que van dexar reforzar la plantiya y amenorgar al mínimu la temporalidá.
Itvasa empecipió’l vienres un procesu de selección pa contratar indefinidamente a 35 inspectores d’estaciones de la inspección técnica de vehículos, ente que la selmana anterior publicó los anuncios pa incorporar a ocho xestores de veceros y a un técnicu de contratación. En total, la compañía va sumar 44 nuevos empleos indefiníos.
Con estes contrataciones, la empresa va amenorgar la eventualidá de la so plantiya al 0,8%, bien per debaxo del tope del 8% fitu como oxetivu nel resolvimientu de 22 de marzu de 2018 de la Secretaría d’Estáu de Función Pública y reflexáu nel alcuerdu ente’l gobiernu y los sindicatos pa la meyora del empléu públicu y les condiciones de trabayu.
Estes midíes de refuerzu, que van dotar a la plantiya de mayor estabilidá, aprobáronse antes de la convocatoria de fuelga en ITVasa. Los sindicatos taben informaos sobre los procesos de selección previstos pola empresa.
Les nueves contrataciones son frutu de la collaboración de Itvasa, la Conseyería de Transición Ecolóxica, Industria y Desenvolvimientu Económicu y les direcciones xenerales de Función Pública del Principáu y de l’Alministración Xeneral del Estáu, encargaes d’autorizar cualquier incorporación o refuerzu d’efectivos llaborales nel sector públicu.
Los contratos que s’ufierten correspuenden a los siguientes alcuerdos:
– Un inspector y dos xestores, como resultáu de la tasa de reposición ordinaria regulada na Llei 31/2022, de 23 d’avientu, de Presupuestos Xenerales del Estáu pa 2023, autorizáu pola Dirección Xeneral d’Empléu Públicu del Principáu’l 14 de marzu.
– 23 inspectores per tasa de reposición específica conforme al Real Decreto-Llei 32/2021, de 28 d’avientu, de midíes urxentes pa la reforma llaboral, la garantía de la estabilidá nel empléu y el tresformamientu del mercáu de trabayu. L’autorización de la Secretaría d’Estáu de Función Pública ye del 11 de xunetu.
-Once inspectores, seis xestores y un técnicu de compres como contrataciones motivaes pola apertura de nuevu centru de trabayu o ampliación del serviciu, al amparu de lo dispuesto nel artículu 20 de la Llei de Presupuestos Xenerales del Estáu pa 2023. L’autorización de la Dirección Xeneral d’Empléu Públicu del Principáu tien fecha del 5 d’ochobre.
Poro, les autorizaciones tienen fecha de marzu, xunetu y ochobre de 2023 y comunicáronse a los sindicatos, que sicasí convocaron fuelga en Itvasa dende’l 14 de payares.
