El voceru d’Izquierda Xunida nel Ayuntamientu de Xixón, Javier Suárez Llana, esixó al Gobiernu municipal que “asuma la so responsabilidá énte’l fracasu del Plan Llave, que demuestra la so incapacidá pa ufiertar soluciones reales a la crisis de la vivienda na nuesa ciudá”. Suárez Llana recordó que “dende’l primer momentu alvertimos que’l plan de Foro nun buscaba facilitar l’accesu a viviendes a precios afayadizos, sinón qu’un puñáu de promotores privaos fixeren negociu con suelu públicu, y nun nos equivoquemos. El problema ye qu’apautaron unos beneficios con Martínez Salvador y agora quieren más y esixen al Conceyu que baxe’l preciu del suelu. Si daquién boicotia’l Plan Llave son el constructores pa los que se diseñó, porque son insaciables”.
Pal conceyal d’IX, “esto ye lo que pasa cuando un Gobiernu se mete a facer negocios en cuenta de centrase en diseñar polítiques públiques que resuelvan los problemes de la xente. El preciu de les viviendes del Plan Llave superaba los 190.000 euros, un preciu que patronal y Conceyu esixíen xubir al Principáu. Pero quien puede mercar una vivienda por esi preciu nun precisa que-y la sovencionen les alministraciones públiques, puede facelo nel mercáu llibre”, esplica Suárez Llana, qu’afirma que “el Gobiernu d’Asturies va xubir el preciu del módulu de la vivienda protexida cuando toque y como toque, pero en nengún casu como respuesta a chantaxes nin pa salvar operaciones inmobiliaries de naide”.
Frente al modelu “fracasáu” de Foro y PP, Suárez Llana destaca que “la única política de vivienda eficaz en Xixón ye la de la Conseyería d’IX: 250 viviendes pa mocedá en plenu centru de la ciudá. Nós nun vendemos fumu, lo que comprometemos cumplímoslo”. Por eso, el voceru volvió insistir nun pidimientu que la so formación lleva dos años treslladando al Gobiernu municipal: “que dexe suelu al Principáu, como tán faciendo conceyos gobernaos por partíos de tolos signos políticos nos que la Conseyería ta promoviendo vivienda pública p’arriendu afayadizu”. “Foro apostó por un modelu que fracasó”, aprofia Suárez Llana, que pide al partíu de Carmen Moriyón que “nun faiga rehén a los y les xixoneses nin de la so manifiesta incapacidá de xestión nin de los compromisos a los que llegara colos empresarios”.
