El voceru d’Izquierda Xunida nel Conceyu de Xixón, Javier Suárez Llana, anunció que la so formación va pidir nel Plenu de la próxima selmana que’l Conceyu afronte una remodelación integral del parque de la Fábrica del Gas “que’l so diseñu, según los servicios qu’ufierta, quedaron obsoletos y yá nun respuenden a les necesidaes del barriu”.
Suárez Llana aportunó en que “tres más de 30 años de vida, ye’l momentu de repensar una zona verde que col pasu de los años convirtióse na gran plaza del barriu de L’Arena, un
puntu d’alcuentru interxeneracional nel que güei, sicasí, tanto neñes y neños como persones mayores reclamen meyores”.
Asina, ente les propuestes recurrentes de vecines y vecinos del barriu tán la construcción d’una pequena pista polideportiva, l’ampliación de la área de xuegos infantiles, el rediseñu de les zones verdes y la meyora de l’accesibilidá en delles zones del parque. Tamién “poner llende a les terraces hosteleres, que d’unos años p’acá invadieron una bona parte del espaciu públicu, enzancando non solo’l pasu sinón llegando inclusive a inutilizar bancos”, denuncia’l voceru.
Suárez Llana caltien que “el parque diseñáu nos años 90 yá nun ye funcional, nun s’afai a los usos actuales y tampoco respuende a los nuevos paradigmes de naturalización urbana que ta enllantando la ciudá”, polo que defende “una remodelación integral que vaiga más allá de parches y que se defina al traviés d’un procesu participativu qu’implique a les vecines y los vecinos del barriu”.
