‘historiador Pelayo Fernández Fernández (Uviéu, 1981) ganó’l Premiu Juan Uría Ríu d’investigación 2021 col so estudiu Actividades escultóricas en la zona suroccidental de Asturias durante los siglos XVII y XVIII: Los talleres de Cangas y Corias.
El xuráu, reuníu esta mañana baxo la presidencia del director xeneral de Cultura y Patrimoniu, Pablo León Gasalla, escoyó por unanimidá esta obra, “una investigación bien completa que toma un marcu ampliu y complexu, tanto dende l’ámbitu territorial como temporal, y qu’inclusive corrixe obres anteriores”. El fallu destaca que’l trabayu “descubre un mundu desconocíu d’arte popular”, por aciu un tratamientu impecable” de fontes y documentos. Tamién valora’l rigor del estudiu y l’interés de la so temática, mesmo que’l“importante valor añedíu” qu’apurren los apéndices.
Pelayo Fernández ye doctor n’Historia del Arte pola Universidá d’Uviéu, publicó delles guíes artístiques sobre’l conceyu de Cangas del Narcea y realizó distintes memories sobre’l patrimoniu cultural asturianu pa l’Alministración autonómica.
La Conseyería de Cultura, Política Llingüística y Turismu convoca’l Premiu Juan Uría Ríu pa distinguir trabayos d’investigación que traten sobre distintos aspectos de la cultura asturiana, bien seyan de calter históricu, etnográficu, filolóxicu o musical, y que faciliten la difusión y promoción del patrimoniu rexonal.
