El Gobiernu d’Asturies va ampliar l’ámbitu d’actuación del polu d’innovación previstu en Navia a tol occidente cola incorporación de L.luarca como see d’esta iniciativa de collaboración públicu-privada. La Conseyería de Ciencia quier constituyir oficialmente’l polu primero qu’acabe l’añu.
L.luarca va acoyer la see nun edificiu municipal de trés plantes allugáu nes cercaníes del institutu Carmen y Severo Ochoa, en disposición pa ser ocupáu y con terrenal colindante disponible, propiedá del Principáu, pa futures ampliaciones en casu de que fuera necesariu.
El conseyeru de Ciencia fixo una valoración positiva del inmueble, que se dexa pal desenvolvimientu de proyectos d’investigación y d’innovación venceyaos a la industria de la zona. Destacó que’l polu va ser un elementu tresformador pal occidente asturianu”, qu’asina va quedar incluyíu nel mapa de la innovación d’Asturies.
Ta concebíu como un axente singular del sistema de ciencia y tecnoloxía y l’oxetivu ye “que la ciencia tenga traslación escontra l’empléu y nueves empreses”, afirmó’l conseyeru. “Queremos que seya un llugar onde asocedan coses y que se treslladen a la economía del occidente asturianu”, añedió.
El proyectu, que cunta p’anguaño con una partida de 100.000 euros, va contribuyir tamién a implementar desenvolvimientos tecnolóxicos, patentes y fomentar l’emprendimientu, l’empléu y la creación de nueves empreses.
