El Gobiernu d’Asturies va poner en serviciu en septiembre una nueva frecuencia de tresporte públicu que va xunir a diariu L.luarca y A Veiga, a primer hora de la mañana, pa reforzar la movilidá sostenible nel noroccidente. Amás, l’horariu de regresu d’esti serviciu va facilitar el desplazamientu del alumnáu ente los cuatro centros de Secundaria de la contorna. Tamién complementa la ruta qu’opera dende’l pasáu añu en sentíu inversu: parte d’A Veiga escontra L.luarca, a les 07:00 hores.
L’anunciu d’esta nueva frecuencia adelantrase pa informar a estudiantes que planteguen cursase tanto Bachilleratu como dalgún de los ciclos de Formación Profesional (FP) de los centros educativos de la zona, que’l so periodu de matriculación abre’l próximu llunes, 24 d’abril.
La nueva ruta va partir de L.luarca, de llunes a vienres, a les 07:00 hores y va tornar a les 14:30 dende A Veiga, con paraes en tolos conceyos de la mariña occidental: Valdés, Navia, Cuaña, El Franco, Tapia, Castropol y A Veiga. D’esta miente, va vertebrar los centros educativos de Secundaria Carmen y Severu Ochoa (L.luarca), Galiléu Galilei (Navia), Marqués de Casariego (Tapia) y Elisa y Luis Villamil (A Veiga), amás del Hospital de Xarrio.
Esti nuevu serviciu, que va empezar a operar col entamu del próximu cursu escolar, compleméntase cola ruta en sentíu inversu que’l Principáu punxo en marcha va un añu y que parte a les 07:00 hores d’A Veiga y torna dende L.luarca a les 14:30. Amás, los usuarios tamién disponen d’otres seis frecuencies diaries por sentíu pa esti percorríu, ente les 06:00 y les 21:45 hores, dientro de la llínea Ribadeo-Uviéu.
