El nuevu plan p’ameyorar les telecomunicaciones y la conectividá n’Asturies va llegar a la práctica totalidá de los habitantes de los Ozcos. Esti programa, denomináu UNICO, quier completar los planes d’esplegue de la banda ancha que se tán desenvolviendo dende 2019 n’Asturies y prevé actuaciones en 125 puntos y más de 230 viviendes de San Martín, Santalla y Vilanova d’Ozcos.
El conseyeru de Ciencia, Innovación y Universidá, Borja Sánchez, visitó esta mañana los trés conceyos y axuntóse colos sos alcaldes: Abel Lastra (Vilanova d’Ozcos), Pedro Álvarez (Samartín d’Ozcos) y Víctor Lorido (Santalla d’Ozcos), a quien-yos esplicó les actuaciones que tienen l’oxetivu d’amenorgar la fienda dixital na zona rural.
El desplegue del Plan d’Estensión de la Banda Ancha (PEBA) de 2019, n’execución per parte de la compañía Acocoro, yá actuó sobre la mayor parte de les zones blanques –con baxa conectividá- de los conceyos.
El nuevu programa llanzáu pol Ministeriu d’Asuntos Económicos y Tresformamientu Dixital, el Plan de Universalización d’Infraestructures Dixitales pa la Cohesión (UNICO), ye una actuación que s’enmarca dientro del Plan de Recuperación, Tresformamientu y Resiliencia y ta financiáu pola Unión Europea al traviés de los fondos NextGeneration.
UNICO va cuntar con una inversión de 24 millones n’Asturies –la metá procedente del Plan de Recuperación, Tresformamientu y Resiliencia- y supón llevar la conexón con más de 100 Megabytes a la práctica totalidá de la población.
El desplegue de fibra óptica de nueva xeneración que se va realizar por Telefónica, compañía axudicataria d’esti últimu plan, inclúi 69 viviendes en Santalla y otres 69 en Samartín, ente que’l númberu d’inmuebles habitaos va llegar al centenar en Vilanova.
El conseyeru recordó que l’oxetivu d’esti programa ye facer un barríu finu d’allugamientos que, pola mor de la so dispersión, nun entraron n’anteriores planes d’estensión de la banda ancha. Búscase asina facilitar que les árees rurales cuenten con meyores telecomunicaciones que puedan potenciar tantol teletrabayu como la fixación de población y la implantación de nueves actividaes económiques.
