La Biblioteca d’Asturies “Ramón Pérez de Ayala”, organismu dependiente de la Conseyería de Cultura, Política Llingüística y Deporte, inaugura mañana la muestra Gastronomía de mesa y papel, una esposición que fai un percorríu didácticu pela historia de la gastronomía asturiana al traviés de les publicaciones editoriales que conformaron la naturaleza e identidá d’esta disciplina.
El montaxe espositivu estrémase en trés espacios precedíos por noticies referentes a l’alimentación asturiana apaecíes n’escritos como’l tratáu d’agronomía de Frai Toribio de Pumarada, dellos documentos de la Sociedá d’Amigos del País, les Cartas a Ponz de Xovellanos o la obra Asturias de Bellmunt y Canella.
El siguiente bloque trata los conteníos rellacionaos colos llibros de cocina y obres referentes a la gastronomía dende 1874, añu nel que se publica un trabayu anónimu baxo’l títulu La Cocina Tradicional de Asturias, hasta 1990. En tercer llugar, destaquen les obres referentes a la gastronomía asturiana publicaes por autores de toles menes, los más d’ellos asturianos. Son materiales que se complementen con semeyes, folletos y cartelería referida a la promoción de la gastronomía característica del Principáu.
Con esta esposición nueva na Biblioteca d’Asturies, la Conseyería de Cultura exemplifica de forma didáctica la riqueza gastronómica del territoriu asturianu al traviés de los llibros. Ye un montaxe que dexa descubrir los raigaños de los que parte la definición de gastronomía asturiana pal imaxinariu colectivu. Una gastronomía y una cocina de calter rural bien marcáu, pero qu’asitia la so base xeográfica n’autores del centru d’Asturies, y sobre manera del valle del Caudal, lo qu’evidencia al empar la necesidá de siguir recopilando informes y informantes, principalmente nes ales d’Asturies, p’afondar na tradición y la realidá culinaria qu’arrodia a estos espacios xeográficos.
La esposición ta comisariada por Lluis Nel Estrada y va poder visitase na Biblioteca d’Asturies “Ramón Pérez de Ayala”, n’Uviéu, de magar s’inaugure a les 13 hores del vienres 14 de xunu, hasta’l 8 de setiembre del 2024, nel horariu habitual d’apertura de la Biblioteca.
