El Gobiernu d’Asturies, el Conceyu de Cangues d’Onís y la Dirección Xeneral de Tráficu (DGT) alcordaron güei cambeos urxentes na regulación de los accesos a los Llagos de Cuadonga. Ente elles, decidióse cerrar la carretera a los vehículos ensin autorizar, sían coches o autocaravanas, mientres les 24 hores del día mientres tea vixente’l plan especial de tresporte.
Xunto cola restricción a la circulación tamién se decidieron otres midíes pa reforzar la seguridá. Asina, l’actual sistema de comunicación interna de los autobuses adscritos al plan de tresporte, al traviés d’emisores vía satélite, va completase con un protocolu d’obligáu cumplimientu que va determinar los puntos d’espera y encruz seguros. Estes zones van ser ampliaes y ameyoraes y, amás, van acondicionase otres nueves específiques pa esti fin.
A tollo súmase’l trabayu de revisión de la flota autorizada pa evitar l’usu de vehículos desaparentes. Esta iniciativa ta venceyada al trabayu que ta desenvolviendo la DGT al traviés d’un procesu de digitalización, información, vixilancia y control empecipiáu en xineru.
Estes midíes añédense a les yá puestes en marcha anguaño, publicaes nel BOE el 27 de xineru, que recueyen dalgunes de les demandes plantegaes por profesionales y actores implicaos nel plan de Llagos. Por casu, adelantróse’l zarru de la carretera a les 7:30 hores, ampliáronse los horarios d’atención presencial na barrera d’accesu y empecipióse la revisión de los vehículos particulares con autorización.
