Octavio Vinck Díaz donó al Muséu del Pueblu d’Asturies la so preciada colección de fotografíes, cámares, aparatos fotográficos y documentación diversa, reunida y atesorada por él mesmu a lo llargo del tiempu, col propósitu de conformar un conxuntu que denominó Fondu Vinck, pa que sirva de testimoniu y valore’l trabayu realizáu por trés xeneraciones de fotógrafos de la familia Vinck na ciudá de Xixón a lo llargo de más d’un sieglu, dende 1905 hasta 2007.
El núcleu de la donación confórmnelu los cerca de 3.500 fotografíes realizaes poles trés xeneraciones de fotógrafos de la familia Vinck: Laureano Vinck Carrió y Aurora Álvarez Sánchez (Foto Vinck); Gonzalo Vinck Álvarez y Victorina Díaz Elvira (Vinalva), y Octavio Vinck Díaz (Vinck-Image Center), que resume’l so trabayu profesional y artísticu dende 1905 a 2007, al que se sumó la dedicación como coleccionista del propiu Octavio Vinck. Les fotografíes atópense nos más diversos soportes y formatos: negativos de vidriu, negativos de celuloide, plaques estereoscópiques, tarxetes postales, daguerrotipos, ambrotipos, positivos en papel, etc.).
El Fondu Vinck apurre amás una colección de 412 cámares, aparatos fotográficos y cinematográficos y otros oxetos rellacionaos cola fotografía, que tomen más d’un sieglu (dende 1893 a 2000), amosando la evolución d’esta técnica con aparatos de bien diversos modelos: de madera, estereoscópiques, 35 mm, baquelita, cámares Box, cámares de fuelle con rollu de película. polaroid, cámares estereoscópiques (dos d’elles pertenecieron a Laureano Vinck), Leicas y visores estereoscópicos pa placa de cristal y papel, cámares utilizaes por Octavio Vinck, etc. Tamién accesorios de llaboratoriu fotográficu como ampliadores, una esmaltadora, una cizalla pa retayar; otros accesorios de cámares, como oxetivos de delles dómines, fotómetros, trébedes, flaxes, etc.; folletos publicitarios, revistes y catálogos de les tiendes Vinalva, Vinck, Image Center y Tiendas Aquí…
Dende’l mesmu momentu de la recepción d’estos materiales, el personal del Muséu del Pueblu d’Asturies púnxose a trabayar nel arquivu, caltenimientu, dixitalización y catalogación de les fotografíes, pieces y documentos que componen esta pervalible colección. Pa dala a conocer y favorecer el so esfrute pol públicu, tán bien adelantraos los preparativos de la esposición que va poder visitase nel muséu a partir de la próxima primavera y que va llevar por títulu Los Vinck. Una saga de fotógrafos
de Xixón (1905-2007).
Les fotografíes digitalizadas tán incorporándose progresivamente al repositorio
dixital fondos.gijon.es dientro d’una colección específica que caltien la denominación de «Fondu Vinck». Amás, al conxuntu donáu por Octavio Vinck sumir 600 fotografíes de Laureano Vinck y Vinalva qu’el Muséu de Pueblu
d’Asturies vieno adquiriendo a lo llargo de los años. A él incorporaránse nel
futuru les que se vaigan faciendo por nuevu compres o donaciones.
