El Gobiernu d’Asturies va poner en marcha nes próximes selmanes el Plan Complementariu de Biodiversidá, que cunta con un financiamientu de dos millones –la metá procedente de fondos europeos- y que va implicar a doce grupos d’investigación. El conseyeru de Ciencia, Borja Sánchez, indicó mientres la so visita al Xardín Botánicu de Xixón qu’Asturies va ser un observatoriu sobre los efectos del cambéu climáticu nos sistemes naturales.
Sánchez precisó que’l programa va desenvolvese hasta 2025 y va cuntar con investigadores de la Universidá d’Uviéu, el CSIC y el Centru Oceanográficu de Xixón. La coordinación científica del programa va ser del Institutu Mistu d’Investigación de Biodiversidá (IMIB), un centru del Principáu, la Universidá y el CSIC. El Botánicu tamién va participar nesti plan complementariu de la mano del so director, Borja Jiménez Alfaro, que va liderar unu de los proyectos.
Esti plan, nel que tamién participen Andalucía, Canaries, Estremadura, Galicia, Illes Balears y País Vascu, cuenta con un financiamientu de 2 millones: daqué más d’un millón con cargu a los fondos del Mecanismu de Recuperación y Resiliencia, y 927.000 euros con fondos propios.
Les principales llinies d’actuación van centrase en:
- Monitorización y Siguimientu de la Biodiversidá
- Inventariu de los Servicios Ecosistémicos
- Evaluación y mitigación del Impactu del Cambéu Global sobre la Biodiversidá
- Rede de Centros pal estudiu y xestión de la Biodiversidá
Les investigaciones van centrase nuna docena de proyectos rellacionaos cola mitigación del impactu del cambéu climáticu, los efectos de la contaminación térmica sobre la biodiversidá, siguimientu de patóxenos n’animales monteses, monitorización de comunidaes d’aves alpines, estudiu d’especies vulnerables y especies invasores, de bioindicadores pa detectar l’impactu del cambéu global nos ecosistemes marinos, etc.
El conseyeru aprovechó la visita al Xardín Botánicu pa conocer les investigaciones que se realicen, según el so bancu de xermoplasma y el so herbariu. Sánchez punxo al centru como referente en programes de ciencia ciudadana, nos que s’implica a la población, y de divulgación científica.
