La Conseyería de Derechos Sociales y Bienestar punxo en marcha güei una biblioteca virtual na so páxina web socialasturias.es d’accesu llibre y gratuitu a profesionales del sistema de protección social, investigadores, estudiantes y la ciudadanía polo xeneral. Esta ferramienta, que va ufiertar sofitu al tresformamientu dixital d’estes prestaciones n’Asturies, arranca con más de mil exemplares en llinia, cifra que se preve aumente de forma constante.
La biblioteca apurre accesu a una gran variedá de recursos ya información rellacionaos colos servicios sociales, como guíes, informes, investigaciones y manuales. La iniciativa ta diseñada pa facilitar la busca al traviés de categoríes temátiques xenerales como mayores, discapacidá, inclusión, infancia y familia, mesmo que temes tresversales como cooperación, accesibilidá y voluntariáu, ente otros.
Amás de dexar busques eficientes, ufierta un espaciu personal pa compartir suxerencies, guardar busques y solicitar préstamos. Tamién apurre actualizaciones recién y bibliografíes específiques na materia.
La biblioteca, diseñada pel Centru de Documentación de Servicios Sociales de la conseyería (https://socialasturias.asturias.es/cdssa) supón dar un pasu más escontra les nueves tecnoloxíes a les que se ta afaciendo’l Gobiernu d’Asturies, col fin d’aprovechar les oportunidaes qu’ufierten p’ameyorar la calidá de vida de les persones y optimizar la xestión de los recursos disponibles.
El tresformamientu dixital ta llevándose a cabu nel marcu del proyectu Aramo que, financiáu con fondos del Mecanismu de Recuperación y Resiliencia de la Unión Europea, busca modernizar y ameyorar la xestión, con un enfoque especial nel tresformamientu tecnolóxicu, innovación y formación.
