La Conseyería d’Educación va formar esti mes a casi 6.000 docentes nos trés primeros niveles de competencia dixital. Los cursos van empobinaos a profesoráu n’activu en centros sosteníos con fondos públicos.
El cursu A1 va empezar mañana y cuenta con una cifra provisional de 1.400 docentes matriculaos. Consta de 40 hores de formación –qu’equivalen a cuatro creitos-, de les que 9 van ser presenciales nel centru n’horariu non llaborable. Les persones destinatarias son aquelles que deseyen empecipiase na competencia dixital.
En cuanto al cursu A2, va impartise na modalidá telemática y completó les 2.500 places ufiertaes, que ye l’aforu encamentáu pa los campus virtuales. Va empezar el 27 d’ochobre y va tener 50 hores duración, qu’equivalen a cinco creitos. Esta formación va destinada a docentes que yá tienen competencia pa trabayar col alumnáu nel tresformamientu dixital y utilicen les sos ferramientes pedagóxiques, pero qu’inda precisen soporte y acompañamientu.
A lo último, la conseyería pretende poner en marcha a finales d’ochobre otru cursu avanzáu, B1, con una previsión d’otres 2.000 places. Esta formación constitúi yá’l primer pasu pa una competencia dixital docente autónoma y tresformadora del aula.
Estos cursos formativos tomen como referencia l’alcuerdu de la Conferencia Sectorial d’Educación, de marzu de 2022, y los apartaos relativos al programa pa la meyora de la competencia dixital educativa CompDigEdu. El pasáu cursu escolar yá s’impartió formación a 2.800 docentes n’A2 y B1 nun trimestre.
