La Conseyería d’Industria, Empléu y Promoción Económica, al traviés del Serviciu Públicu d’Empléu (Sepepa), va destinar anguaño 16.325.793 euros a los programes d’escueles taller y talleres d’empléu que desenvuelven corporaciones locales y entidaes ensin ánimu d’arriquecimientu. Esta cifra supera en más de 1,3 millones los fondos dedicaos a dambes iniciatives l’exerciciu pasáu y a ella súmense tamién otros 184.500 euros en beques y ayudes pa participantes.

El director xeneral d’Empléu y Formación, Pedro Fernández-Raigoso, y la directora xerente del Sepepa, Pilar Varela, destacaron güei que’l refuerzu de dambos programes enmárcase nel compromisu del Gobiernu d’Asturies coles polítiques actives d’empléu como ferramienta esencial  pa la llucha contra’l desempléu y la meyora de la empleabilidá.

Fernández-Raigoso y Varela visitaron el taller d’empléu que desenvuelve’l Conceyu de Llangréu en Valnalón, acompañaos pola alcaldesa, Carmen Arbesú, y el conceyal d’Empléu, Promoción Económica, Urbanismu y Mediu Ambiente Javier Álvarez.

Los talleres d’empléu son un programa mistu d’empléu y formación empobináu a ameyorar la empleabilidá de les persones desemplegaes de 25 años o más y con especiales dificultaes d’inserción llaboral. Los proyectos tienen una duración total de 12 meses, distribuyíos en dos fases de formación n’alternanza col empléu de 6 meses caúna. Nesta edición aprobáronse 38 proyectos a los que’l Sepepa va aportar 12.150.237 euros pa beneficiar a 513 paraos.

Pela so parte, les escueles taller tamién combinen empléu y formación, pero van dirixíes a la meyora de la empleabilidá de menores de 25 años en situación de desempléu. Estes iniciatives tienen una duración total de 18 meses, distribuyíos nuna primer fase de 6 meses de calter formativu y dos más, de formación n’alternanza cola práctica profesional, de 6 meses caúna.

Sofitu del Sepepa a la empleabilidá en Llangréu

El taller d’empléu municipal de Llangréu, qu’empezó’l 1 d’ochobre, ta empobináu a actividaes de llimpieza y meyora medioambiental d’espacios abiertos y instalaciones industriales, concretamente de los polígonos y árees industriales. El Sepepa dedica a esta actuación, na que participen 15 persones (8 alumnes y 7 alumnos), una subvención de 355.270 euros.

Amás del taller d’empléu, Llangréu tamién desenvuelve una actuación dientro del programa Ocúpate, nel que s’imparte formación y práctiques a xóvenes desemplegaos. Con 12 participantes (4 alumnes y 8 alumnos), facilita certificaos de profesionalidá n’actividaes vinculaes al sector de la llimpieza. El Sepepa dedica 156.090 euros.

Pedro Fernandez-Raigoso y Pilar Varela tamién aprovecharon la visita a Llangréu pa poner en valor l’amenorgamientu del desempléu nel conceyu nel 2021. Según los datos oficiales, el conceyu zarró l’añu pasáu con 3.286 paraos rexistraos, un 18,29 % menos que nel 2020, lo que supón un descensu de 736 persones. Destaca sobre manera la baxada nun 26,24 % del desempléu ente menores de 30 años (185 paraos menos), al zarrar l’exerciciu con 520 demandantes frente a los 705 del añu anterior.

Presupuestu del Sepepa

El Serviciu Públicu d’Empléu cunta anguaño con 139.332.120 euros de presupuestu, un 13,04 % más que nel 2021, al incorporar 12.027.875 euros de fondos provenientes del Mecanismu de Recuperación y Resiliencia (MRR) distribuyíos pola Conferencia Sectorial d’Empléu y Asuntos Llaborales.

Les cuentes del Sepepa respuenden a los alcuerdos de concertación social y la distribución de los programes y acciones establecíos nel conseyu rector, onde amás del Gobiernu d’Asturies participen los axentes sociales y económicos. Les partíes más destacaes del presupuestu son:

  • Planes d’empléu, que pasen de 12.000.000 a 13.500.000 euros.
  • Escueles taller y talleres d’empléu (FSE+), que pasen de 14.990.551 a 16.325.793 euros y cunten con otros 184.500 pa beques.
  • Xoven Ocúpate, que pasa de 4.494.099 euros a 5.200.000 euros.
  • Contratos en práctiques pa xente mozo: de 3.330.000 a 5.000.000 euros.
  • Ayudes a la contratación indefinida: 4.250.000 euros.
  • Midíes de sofitu a la FP dual: 2.000.000 euros.
  • Incentivos a la formación con compromisu de contratación: 250.000 euros.
  • Formación pa trabayadores ocupaos y paraos: 25.169.601 euros.
  • Nuevos programes financiaos con fondos del Mecanismu de Recuperación y Resiliencia (MRR), ente los que figuren:

o    Una llinia nueva d’ayudes al entamamientu nel marcu de los programes territoriales pal reequilibriu y la equidá (xestionada pola Dirección Xeneral de Comerciu, Entamamientu y Economía Social), a la que se destinen 3.948.000 euros.

o    El programa Xoven Investigo, de creación nueva, al que van destinase 2.844.156 euros pa contratar a 174 xóvenes nos ámbitos de la investigación, la tecnoloxía y otros perfiles profesionales vinculaos a la I+D+i, asina como a personal de sofitu.

o    El Programa Primera esperiencia llaboral nes alministraciones, al que van destinase 2,28 millones pa la contratación de 150 paraos nuevos por organismos públicos.