La Conseyería d’Industria, Empléu y Promoción Económica va destinar 207.500 euros en 2022 a impulsar l’actividá del sector artesanu al traviés de dellos programes de sofitu. Anguaño, la Dirección Xeneral de Comerciu, Entamadores y Economía Social xestiona trés llinies d’ayudes:

  • 100.000 euros a les asociaciones profesionales pa la organización de feries y cursos de formación. Anguaño concediéronse subvenciones por un importe de 74.379 euros pa la celebración d’ocho certámenes.
  • 40.000 euros pa la meyora d’activos fixos, básicamente, la modernización y renovación de los equipos de los talleres. A lo llargo d’esti exerciciu concediéronse 15.221 euros pa 14 talleres.
  • 35.000 euros pa asistencia a feries y cursos fuera del ámbitu autonómicu. En 2021 abonáronse 34 subvenciones por una cuantía de 5.221 euros.
  • 30.000 euros n’una subvención nominativa al Conceyu d’Uviéu pa la celebración de la feria d’artesanía de Navidá, la más importante d’Asturies, qu’axunta a cerca de 60 profesionales.
  • 2.500 euros pa la celebración del concursu Pieza única.

Asturies cunta con un censu de 84 oficios artesanos y 227 profesionales activos, según los datos del Rexistru d’Artesanos. Una docena d’actividaes concentren el mayor númberu de profesionales: xoyería, ceramistes, muralistes, esmaltistes y modeladores; marroquinería, carpintería, azabachería, tallistes de madera, modistes y xastres; ebanistería, cuchillería y navyería, bixutería, platería, repuxáu y decoración del cueru.

La llista ye bien estensa ya inclúi tamién a abarqueros, ellaboradores de calceta y ganchiyu, cesteros, encuadernadores, ferreros, constructores de xuguetes y moñecos, moldeadores de vidriu, fabricantes de vidreres, texedores, productores de traxes rexonales y zapateros.

El director xeneral de Comerciu, Entamadores y Economía Social, Julio González Zapico, destaca la variedá d’oficios artesanos, el nivel artísticu y la calidá de los profesionales, que la so actividá permitió recuperar o caltener vivos llabores que podíen desaniciase va años. “L’oficiu de l’artesanía ye difícil y complicáu, dacuando poco valoráu, y l’actividá depende en bona midida de la celebración de feries y eventos, daqué que pudimos retomar dafechu anguaño tres les restricciones obligaes pola pandemia”, aseguró.

Concursu Pieza única y otros sofitos

La Dirección Xeneral de Comerciu entama una nueva edición del concursu Pieza única col fin de visibilizar el llabor artesanal n’Asturies, coincidiendo coles fiestes de Navidá. Les pieces participantes van permanecer espuestes hasta’l 29 d’avientu nel patiu de columnes del Palaciu del Conde de Toreno, na plaza Porlier d’Uviéu, n’horariu de 10:00 a 14:00 y de 17:00 a 19:00 hores.

El certame inclúi un primer premiu dotáu con 1.500 euros y un segundu de 1.000.

Na edición d’anguaño participen 24 creaciones que representen la mayoría de los sectores artesanos: bixutería, cerámica, cueru, madera, xoyería, testil, vidriu, etcétera.

Amás de les llinies d’ayudes y de esti concursu, Industria tamién fomenta la proyección internacional del sector nos Díes Europeos de l’Artesanía, p’averar al públicu les claves del trabayu de lutieres, xoyeros, ceramistes, encaxeros, ferreros, texedores y tou tipu d’oficios, col propósitu d’espublizar la enorme riqueza y singularidá d’estes actividaes.

Estes conmemoraciones celébrense añalmente na primer selmana d’abril en toa Europa y la conseyería encárgase de la so organización n’Asturies.

Coles mesmes, pa caltener la vinculación ente la esencia artesanal y les tecnoloxíes, el Principáu xestiona la web www.artesaniadeasturias.com, onde se promociona a tolos profesionales qu’asina lo deseyen. Tamién aporta información d’eventos, noticies, publicaciones y actividaes rellacionaes col sector artesanal. La páxina va dirixida tanto a los mesmos artesanos como al públicu polo xeneral.