El Gobiernu d’Asturies autorizó’l gastu y la contratación de les obres de construcción del nuevu institutu d’enseñanza secundaria (IES) de La Corredoria, n’Uviéu. L’equipamientu volverá salir a llicitación con un presupuestu de 18.884.872 euros, 7,64 millones más que la vegada pasada, y un plazu d’execución de 24 meses.
L’Executivu viose obligáu a dexar ensin efectu n’agostu’l contratu cola anterior empresa axudicataria, qu’argumentara dificultaes económiques. A partir d’esi momentu, Educación entainó les xestiones pa sacar a llicitación y axudicar les obres al traviés d’un procedimientu d’urxencia. El proyectu se revisó y actualizó, lo que traxo una medría de 7,64 millones sobro’l presupuestu anterior.
L’actuación inclúi la creación de 24 unidaes: 16 aules d’Educación Secundaria Obligatoria (ESO) y 8 de Bachilleratu, amás d’una pista deportiva. La Conseyería d’Educación espera que los trabayos empecipien nel primer trimestre de 2023, coles mires de que’l nuevu centru pueda tar operativu pal cursu escolar 2025-2026.
