El Gobiernu d’Asturies, al traviés de la Dirección Xeneral d’Igualdá, va entamar güei’l primer hackatkon contra la violencia de xéneru que se realiza n’Asturies y que pretende diseñar una aplicación tecnolóxica (app) pa la promoción de la igualdá y la llucha contra les agresiones machistes.
El hackatkon, que’l so nome vien de les palabres hacker y maratón, consiste nun concursu con una llimitación temporal determinada y, nesti casu, tien como retu diseñar una app. El certame ta empobináu al alumnáu d’Informática de centros universitarios, de Formación Profesional (FP) y de formación pal empléu, con un total de 49 persones inscrites nesta edición.
Pa encarar la competición, equipos d’ente trés y cuatro estudiantes van trabayar en Llaboral Ciudá de la Cultura, de 09:00 a 14:00 hores, nel desarrollu d’idees y soluciones dixitales cola mira de desenvolver una aplicación pa la promoción de la igualdá y la llucha contra les agresiones machistes.
Mientres la mañana, les persones integrantes de los distintos equipos van responder individualmente a un cuestionariu sobre igualdá y van asistir a dos clases maxistrales: una sobre igualdá y prevención de la violencia de xéneru y otra sobre’l desarrollu d’aplicaciones pa dispositivos móviles. Darréu, los grupos van realizar una propuesta pilotu sobre’l conteníu y l’arquitectura de la posible app, col asesoramientu del profesoráu del so centru educativu y del personal de la organización.
Los equipos finalistes van competir na mañana del xueves próximu, día 28, cuando van presentar públicamente les sos propuestes énte un xuráu, mientres un plazu de 15 minutos. L’equipu ganador va recibir un premiu de 500 euros; los dos finalistes, dos gallardones de 250, y la persona que meyor realice’l cuestionariu inicial va llograr una tableta.
El xuráu va tar compuestu por persones espertes nos ámbitos de la igualdá y la tecnoloxía. Nel so análisis sobre les propuestes d’aplicación, van valorar el diseñu y la creatividá, l’impactu y la utilidá, la usabilidá, l’accesibilidá, la innovación, la funcionalidá fuera de llinia, la seguridá y la compatibilidá colos últimos sistemes operativos.
La Dirección Xeneral d’Igualdá convoca esta actividá cola voluntá de consolidala como un certame añal y coles mires d’introducir la conocencia sobre la igualdá y la prevención de la violencia de xéneru nel ámbitu tecnolóxicu. “La innovación tecnolóxica al serviciu de la innovación social pue facilitanos ferramientes pervalibles pa construyir un futuru más igualitariu y, sobre manera, pa erradicar la violencia de xéneru”, aseguró la directora, Nuria Varela.
Pa más información: https://www.clustertic.net/hackathon-contra-la-violencia-de-genero/
