Pocos edificios n’España tendríen más usos distintos qu’el de la fábrica de conserves Lis de L’Arena. Amás del industrial, l’inmueble acoyó a lo llargo del so sieglu de vida un hotel, un casinu, un cine, una discoteca y hasta una ilesia. La diversidá de funciones del mesmu son una clara amuesa de les vicisitúes que tuvo que travesar. Sicasí, esti edificiu modernista lleva agora más d’una década en desusu, y la fachada foi perdiendo la pintura hasta dexar a la vista capes de pintura anteriores y lladriyu. Amás, tien mugores y crecen pequenes plantes nella. Dellos cristales de les ventanes tán rotos y llegáronse a producir desprendimientos, lo cual llevó a abarganar la cera allegante en 2020 pa evitar riesgos a les persones. Nesi mesmu añu, tamién s’encontió l’edificiu p’aseguralo.
Por estos motivos, l’antigua fábrica de conserves Lis de L’Arena acaba d’incorporase a la Llista Colorada del Patrimoniu qu’ellabora l’asociación Hispania Nostra (www.listarojapatrimonio.org) y que recueye más de mil monumentos españoles que s’atopen sometíos a riesgu de desapaición, desaniciu o alteración esencial de los sos valores.
Esta fábrica foi una amuesa de la importancia de la industria conservera en L’Arena, que llegó a ser la principal empleadora de cientos de muyeres. Asina, trabayar nes conserveres foi unu de los principales medios d’incorporación de la muyer al trabayu fabril nes décades iniciales del sieglu XX. Les quiebres y los cambeos de localizaciones provocaron la desapaición de la industria conservera en L’Arena y con ella’l pieslle de la fábrica de Lis. Darréu, l’edificiu convirtióse nuna discoteca, en funcionamientu hasta los años noventa. De magar, atópase abandonáu.
D’estilu modernista de principios del sieglu XX, ta incluyíu nel inventariu del patrimoniu cultural d’Asturies. Trátase d’un edificiu de mampostería encalada al esterior y vista nos sectores interiores, onde s’aprecia’l encintáu de los vanos con lladriyu. Entamáu en dos altores y distribuyíu en dos volumes- unu d’ellos ocupa una esquina- conectaos por una terraza, constitúi un exemplu inusual nesti tipu d’instalaciones, que presenten casi toes cierta severidá constructiva.
