Iniciativa pol Asturianu considera decepcionante y poco ambiciosa la presencia de la llingua asturiana y del eonaviegu nos nuevos currículos educativos presentaos pola Conseyería d’Educación nes selmanes caberes. La organización reclama al executivu una presencia digna de les llingües propies en toles etapes educatives pa dar cumplimientu al mandatu de la Llei d’Usu. L’artículu diez d’esta norma establez que «el Principáu d’Asturies ha garantizar l’enseñu del bable/asturianu en tolos niveles y graos» y garantiza que los alumnos qu’escueyan el so aprendimientu tendrán de recibir «la mesma formación y conocimientos n’igualdá de condiciones que’l restu del alumnáu».

Los currículos educativos ellaboraos pola Conseyería d’Educación pa concretar l’aplicación de la LOMLOE na comunidá namás recueyen pequeños avances pa Llingua Asturiana nel casu de Bachilleratu, onde esta materia pasa d’una a tres hores selmanales. Sicasí, l’asignatura va siguir compitiendo con otres asignatures nesta etapa, como tamién pasa en Secundaria, contraviniendo l’espíritu de la citada llei. Nel restu d’etapes educatives la presencia de l’asignatura nun ameyora: pierde una hora nel cuartu cursu de Secundaria y caltién una insuficiente hora y media selmanal en Primaria. Nel casu de la educación Infantil nin siquiera se cita.

La entidá reclama que la presencia del asturianu dientro de la formación educativa tenga una mayor continuidá y refuga los saltos d’hores dependiendo del cursu y la etapa. «Esto llograría dar estabilidá a l’asignatura y permitiría tamién un refuerzu nos propios conocimientos del alumnáu”.

Pela so parte’l sindicatu SUATEA calificó’l proyectu de currículu d’Educación Infantil como un testu qu'»incumple dafechu la lexislación autonómica».

Nel “preámbulo”,  que formalmente ye onde s’especifiquen los fundamentos de fechu y de derechu, nun hai nenguna mención al artículu 4 del Estatutu d’Autonomía d’Asturies onde nel so puntu 2 faciendo refencia al asturinau  “ promoverase’l so usu, la so difusión nos medios de comunicación y la so enseñanza…” Tampoco a la Llei d’Usu  que nel so artículu 10 se dedica especialmente al currículu y obliga  a grarantizar  l’enseñu de les nuestres llingües de forma voluntaria :“10.1. Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu”. 

Nel so articuláu tampoco se regula nengún conteníu de les nuestres llingües nin siguier de manera equivalente a la  llingua estranxera, Inglés, onde nos saberes básicos pal Segundu Ciclu refier: “– Aproximación a la lengua extranjera. Elementos para una comunicación funcional básica.”

Pal Gobiernu asturianu y les sos conseyeríes competentes en normalización llingüística y educación, los asturianos y les nuestres llingües nun tienen siquier la categoría curricular de “estranxeres”  ye dicir estrañes, rares, cenciellamente son alieníxenes pues fáenles desapaecer dafechu del currículu o como muncho formen parte d’un decoráu contestual ambiental sonoru ensin mayor trescendencia educativa.

Esta ausencia curricular supón pa SUATEA, amás d’una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu, nel procesu de recuperación llingüística y na falta de continuidá nos conteníos ente la etapa EI y Primaria. Na etapa de Primaria sigue col tratamientu curricular anterior y una carga horaria marxinal, una hora y media selmanal, énte les 5 de Castellán o les 3-4 d’Inglés.

Na Educación Secundaria Obligatoria mérmase la carga horaria una hora nel cómputu selmanal global pasando de 9 a 8 hores. En Bachilleratu aumenta  de 1 hora a 3 hores (cola LOE llegó a tener 4). Nestes últimes etapes educatives preuniversitaries amás tien de competir na optatividá con otres asignatures como segunda llingua estranxera, “Taller de Economía Aplicada”, “Digitalización”, “Proyecto de Emprendimiento Socia”l o “Cultura Clásica”, contrariamente a lo dispuesto por l’artículu 4 del nuestru estatutu autonomía onde prescribe la voluntariedá del so deprenzax, non la so optatividá.

En resume, pa SUATEA: un Gobiernu que diz tar a favor de la oficialidá presenta unos currículos que paralicen l’avance hacia ella y caltién les nuestres llingües na situación de marxinalidá que vien sufriendo dende hai cuasi 40 años de gobiernos prácticmente siguíos  del PSOE.

Acabar con esta situación de paralís ye urxente si nun queremos qu’esanicie’l nuestru patrimoniu llingüísticu. Magar que la oficialidá ye’l marcu xurídicu afayaízu pa recuperamos d’esi paralís, curricularmente podemos arimanos a ella.

Dende SUATEA esixen la modificación del proyectu de currículu d’EI pa que recueya l’enseñu de les nuestres llingües n’equidá col castellán, asina como la modificación de los currículos de Primaria, ESO y Bachilleratu onde se recueya un tratamientu horariu, de conteníos y metodolóxicu asemeyáu al castellán.