El pasáu vienres 2 de febreru les puertes de la Sala Acapulco de Xixón abriéronse pa recibir a una de les bandes de rock más conocíes del panorama nacional. Yá a les 19:30h la xente diba agolpándose na entrada de la sala naguando por dar empiezu a una tarde-nueche que prometía rock y alcordances, non en vanu La Fuga forma parte de la banda sonora de toa una xeneración.
Pasaes les 20:30 hores la banda salía al escenariu énte un públicu espectante, que nun tardó en metese nel bolsu al sonar los primeros acordes de «En vela». Darréu, caltuvieron l’entusiasmu con «Majareta» y «Trampas al sol».
Los cántabros fixeron un repasu de los temes más destacaos de la so carrera nos que nun faltaron «La balada del despertador» o «Baja por diversión» ente otros, anque tamién hubo tiempu pa dalgunos cantares más nuevos y pa presentar el so últimu single «La guarida».
Al rodiu de la hora y media, La Fuga despidióse, rematando con una traca final de temes clásicos que’l públicu de la Acapulco coreó deseyando que la nueche nun acabara nunca.
