El Gobiernu del Principáu aprovechó la celebración de la segunda xunta del grupu de trabayu que se va encargar de redactar el borrador de la futura llei LGTBI autonómica p’abordar les midíes que son necesaries implementar nel ámbitu educativu p’avanzar na defensa de los derechos y llibertaes de les persones lesbianes, gais, transexuales, bisexuales y intersexuales.
Dende la see de la Conseyería d’Ordenación de Territoriu, Urbanismu, Vivienda y Derechos Ciudadanos, la directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez López, esplicó que la intención ye que la normativa recueya toos aquellos aspectos que garanticen el tratu que’l colectivu reivindica dende la educación.
Nesti sentíu, Francisco Borrego, tesoreru de la Rede Educativa de Sofitu LGTBI+ d’Asturies, recordó qu’esta ye una “reivindicación histórica”, yá que ye necesariu que la comunidá educativa disponga de “una llínea d’actuación” que dexe ameyorar les condiciones de vida del alumnáu LGTBI y sirva d’orientación pal profesoráu.
Esti grupu de trabayu ta formáu por casi una decena de colectivos coles mires de garantizar qu’Asturies disponga d’una llei consensuada. En concretu, esti grupu constituyéronlu miembros de Xega y Xega Families, Llar Trans, Colibrís n’Acción, la Rede Educativa de Sofitu LGTBI+ d’Asturies, Faciendo Camín, Xuntes y Diverses, según los sindicatos Comisiones Obreres y UXT.
Esta segunda xunta llega dempués de que’l pasáu 30 de payares celebrara’l primer alcuentru, cita que sirvió pa presentar el grupu de trabayu y establecer la organización y metodoloxía que se va llevar a cabu nos próximos meses hasta poder cuntar col borrador de la llei.
La intención ye crear dende cero la futura norma, con base na Llei pa la Igualdá Real y Efectivo de les Persones Trans y para la Garantía de los Derechos LGTBI, aprobada en febreru pol Gobiernu d’España.
