La entrada a valir de la Llei 1/2019, pa la Recuperación de la Memoria Democrática nel Principáu llogró la eliminación o resignificación de 24 símbolos franquistes na comunidá. Asturies entá caltien ocho amueses d’esaltación de la dictadura n’espacios públicos y empecipiáronse los trámites pa suprimir otros 28. El catálogu de muertes de la guerra civil y la dictadura franquista recueye un total de 228 elementos.
Concretamente, dende’l 1 de marzu de 2019 camudóse’l nome de seis calles, cuatro d’elles n’Uviéu (Xeneral Yagüe, Marcos Peñarroyo, Fernández Ladreda y Yela Utrilla), una en Tinéu (Calvo Sotelo) y otra n’Ayer (Ángel del Valle). Tamién se retiraron dos cruces (Avilés y Cuideiru), trés plaques (Caravia, Llanes y Mieres), un vítor de simboloxía franquista en Bisuyu (Cangas), un escudu en Noreña, un monolitu en Villaviciosa, un monumentu en Lluniegu (Uviéu) y un mural en Xixón.
Nel casu d’otros seis elementos consideróse que tienen valor históricu, artísticu o patrimonial, polo que s’optó por asitiar una placa esplicativa del contestu nel que s’alzaron. Esto ye lo qu’asocedió, por casu, con dos escudos y una vidrera de la Universidá d’Uviéu, pa los que la institución académica alcordó yá la reasignación, y cola cruz inscrita al pie de la capiya del Humilladero en Cuideiru.
La llei establez que la recuperación de la memoria democrática ye una obligación ética, política y llegal de los poderes públicos, por eso enceta la eliminación de los símbolos qu’aponderen los valores fascista y antidemocráticu de la dictadura. Cuando esto nun ye posible, decide señalizáselos como elementos difusores de conocencia de la hestoria recién, col fin de garantizar qu’esos fechos nun se repitan ente les xeneraciones nueves.
