Llaboral Ciudá de la Cultura celebra una Xornada de Puertes Abiertes el próximu domingu 17 de setiembre con visites, programación artística, talleres y esposiciones.
Esi día realizarán visites guiaes a la Sala de Pintures, la Biblioteca de la Facultá de Comerciu, Turismu y Ciencies Sociales “Xovellanos”, los talleres del C.I.F.P. La Llaboral y xubíes al Mirador de la Torre. Estos percorríos guiaos, con aforos llendaos, van realizar de 10:30 a 14:30 y de 16:00 a 20:00 hores, de forma continua cada 30 minutos.
Llaboral Centru d’Arte y Creación Industrial va abrir esti domingu de 12:00 a 19:00 hores, onde pueden visitase les esposiciones From Spain With Design y Volver a pasar por el corazón. Amás, los artistes Pablo Casanueva, Laura Fjader, Sara García ya Irene Trapote van emponer a les 12:30 hores una visita pola amuesa Volver pasar pol corazón.
Na Recepción de Llaboral Ciudá de la Cultura tamién permanez abierta la esposición Sonata Berlinesa, un proyectu fotográficu de Nicolás Cancio, comisariáu por José Ferrero. El domingu Cancio va emponer una visita pola amuesa a les 13:00 y 18:00 hores y va caltener una charra-alcuentru col públicu a les 19:00 hores.
La compañía Caramuxo Teatro va poner n’escena a les 20:00 hores nel Teatru l’espectáculu Crisalida, incluyíu nel proyectu Camino Escena Norte, y el públicu va tener la oportunidá de ver el montaxe d’esta obra a les 12:30 y 13:30 hores. L’alumnáu de la Escuela Superior d’Arte Dramático del Principáu d’Asturies, dirixíu por Borja Roces, va tresformar les Escaleres, un espaciu cotidianu, nun llugar especial a les 12:00 y 17:00 hores, y Carlos Alba va ufiertar un cuentacuentos en llingua asturiana, Mitoloxíes, a les 12:30 hores nel Paraninfu.
De la mano de Esemble l’arca va haber Música escondida na Llaboral, con cinco mini conciertos repartíos mientres tola xornada (a les 12:15, 13:15, 17:15, 18:15 y 19:15 hores) en cinco localizaciones distintes; cada actuación va cuntar con una selección musical diseñada especialmente pa la ocasión. Coles mesmes, nel Paraninfu proyectaráse’l vídeu Llaboral, espaciu de tresformamientu, con pases a les 11:00, 16:30, 18:00 y 19:30 hores.
El públicu familiar tamién va poder participar nel cuentacuentos y taller ¡Titiriteros n’acción! con Elisabet Martín Teatru, l’escape ¡Salvái la Llaboral! con Blinca y Cuntar hestories con José Busto de Teatro a las Puertas.
Toles actividaes son gratuites. Pa les visites y los talleres l’aforu ye llendáu y pa la programación artística, la entrada ye llibre hasta completar aforu.
