La conseyera de Cultura, Política Llingüística y Deporte, Vanessa Gutiérrez, caltuvo una primer xunta de trabayu col doctor arquitectu Valentín Arrieta Berdasco, que s’incorpora güei como profesional dedicáu específicamente al caltenimientu de la Llaboral. L’alcuentru sirvió p’afrontar les necesidaes del conxuntu y establecer les primeres llinies de trabayu pa planiar y realizar el siguimientu de les actuaciones nún de los principales conxuntos monumentales d’Asturies.
La xunta completóse con un percorríu peles instalaciones. Gutiérrez y Arrieta visitaron distintos espacios de La Llaboral pa conocer sobre’l terrenu les sos característiques y necesidaes y repasar les actuaciones que se desenvuelven anguaño. Esti primer percorríu dexó tomar contactu directu con un complexu que, poles sos dimensiones y singularidá, rique una atención técnica específica y siguida.
La incorporación d’Arrieta materializa’l compromisu anunciáu esti mes pol presidente, Adrián Barbón, de dotar a La Llaboral d’un profesional dedicáu específicamente al conxuntu monumental. Cuntar con esta figura va dexar realizar un siguimientu permanente, antemanar necesidaes y ordenar y planiar les intervenciones a mediu y llargu plazu.
Una de les sos primeres xeres va ser ellaborar un plan de caltenimientu preventivu y, a partir d’él, un programa añal de caltenimientu que dexe establecer prioridaes y programar les actuaciones. Tamién va realizar el siguimientu de los trabayos de caltenimientu y restauración, va supervisar los contratos de caltenimientu y va velar por que les intervenciones que se desenvuelvan nel complexu seyan compatibles cola protección del monumentu.
El so trabayu va tomar igualmente la documentación técnica y patrimonial de La Llaboral, que tendrá que caltenese actualizada, asina como la preparación de los informes y documentos necesarios pa futures intervenciones. Arrieta va caltener amás una coordinación directa colos servicios de Patrimoniu Cultural, especialmente naquelles actuaciones que, pola condición de Bien d’Interés Cultural (BIC) del conxuntu, tengan que sometese a l’autorización del Conseyu del Patrimoniu Cultural.