La Conseyería d’Ordenación de Territoriu, Urbanismu, Vivienda y Derechos Ciudadanos aseguró güei a los representantes de la plataforma La Maletería nun se tira que’l proyectu que se lleve a cabu nel edificiu uvieín, onde se van construyir 29 viviendes de protección oficial y energéticamente sostenibles, va caltener más que la fachada principal y bona parte de la zona verde. Asina lo anunció’l director xeneral d’Ordenación del Territoriu y de Vivienda en funciones, Ignacio Ruiz Latierro, quien esplicó que los pliegos que va redactar el so departamentu van dar más puntuación a los proyectos qu’apuesten un mayor caltenimientu tanto del inmueble como de la so redolada.
“Vamos esixir un volume mínimo d’edificiu a caltener y el concursu tamién va valorar positivamente y cola mayor puntuación aquelles propuestes que caltengan la mayor parte de la zona verde dientro de la parcela”, esplicó.
El proyectu, qu’inclúi la creación d’un centru de día amás de les citaes viviendes, va realizase al traviés de la fórmula del derechu de superficie. El superficiariu que resulte ganador del concursu públicu va xestionar la propiedá mientres 70 años so la supervisión del Principáu y va ser el responsable de la edificación.
