El gobiernu d’Asturies aprobó una partida de 1.450.000 euros pa la construcción de 29 viviendes de protección oficial destinaes a alquiler afayadizu pa persones mayores nel emblemáticu edificiu de La Malatería, nel barriu de San Llázaro d’Uviéu. Tamién ta prevista la creación d’un centru polivalente con 70 places de capacidá.
Esti va ser el primer exemplu de vivienda dotacional que se va poner en marcha na capital asturiana. Los agospiamientos dotacionales son residencies temporales para sectores de la población como moces, mayores, colectivos desfavorecidos o persones con necesidaes especiales.
Va suponer una inversión global de 6.289.023 euros,con unos pisos que van construyise al traviés d’un mecanismu de collaboración ente l’Alministración pública y el sector priváu, por aciu la concesión de derechos de superficie por un plazu de 75 años. D’esta manera, Asturies va apurrir 1,45 millones, correspondientes a fondos europeos Next Generation del Mecanismu de Recuperación y Resiliencia (MRR), y los 4.839.023 euros restantes va sufragar la entidá que resulte axudicataria del derechu de superficie. Esta postrera va asumir tamién la construcción, promoción y caltenimientu de los inmuebles, siempres so la supervisión y el control del gobiernu.
Les viviendes de La Malatería van tener una superficie media de 60 metros cuadraos y van ser energéticamente sostenibles. Amás, los pliegos del concursu planteguen el caltenimientu de tol cuerpu delanteru del edificiu y de bona parte de la so zona verde. A partir d’esi mínimu de preservación, va otorgase mayor puntuación nel procesu de llicitación a aquelles ufiertes qu’apuesten por una mayor protección del inmueble y de les árees axardinaes.
La partida autorizada pol Conseyu de gobiernu pa l’actuación nel conceyu d’Uviéu súmase a otra decisión adoptada’l 26 d’abril: el gastu de 10.370.000 euros pa la construcción de 294 viviendes destinaes al alquiler afayadizu pa mozos en Xixón y Siero. Asina, n’apenes dos selmanes diose lluz verde a una partida global de 11,8 millones pa edificar 323 pisos que van movilizar en global una inversión de más de 55,5 millones.
