La Conseyería de Presidencia, Retu Demográficu, Igualdá y Turismu va destinar cuatro millones a diverses inversiones na contorna del Monte Central, financiaes con fondos europeos Next Generation, tres la firma del correspondiente conveniu del plan de sostenibilidá turística. La ventena d’actuaciones previstes pa los conceyos de Riosa, Ayer, Morcín, La Ribera, L.lena y Mieres suman una inversión de 3.967.182 euros: 1,19 pa transición verde y sostenible, 1,38 pa eficiencia enerxética, 555.334 pa transición dixital y 835.894 para aumenta la competitividá.
Ente les midíes p’avanzar hacia una transición verde y sostenible destaquen la recuperación ambiental d’espacios mineros pa usu turísticu, l’adaptación al cambéu climáticu d’estaciones d’esquí, la instalación de contenedores soterraos pa separación y reciclaxe, y l’adecuación de miradores y árees de descansu.
Tamién se van desenvolver infraestructures ciclistes y van afaese dellos itinerarios non motorizaos. Per otra parte, col fin d’ameyorar la eficiencia enerxética, va instalase allumáu intelixente y autónomu, qu’aprovecha la enerxía solar nes siendes piatonales.
P’avanzar na transición dixital, va poner en marcha un sistema d’indicadores pa desenvolvimientu sostenible, qu’inclúi la instalación de ecocontadores nos principales itinerarios ciclosenderistes y la creación d’una oficina turística virtual.
En cuanto a la exa de competitividá, destaquen un plan gastronómicu, la puesta en marcha del Muséu del Ciclismu d’Asturies y la rehabilitación de la redolada del palaciu de los Faes, en Carabanzo (L.lena).
