Revisamos nesti artículu la nuesa esperiencia na tercer edición del Vibra Mahou Fest que se celebró en Xixón el pasáu sábadu. Una cita que munchos teníamos apuntada nel calendariu dende que se colgar el cartelu de Sold Out el mesmu día que se punxeron a la vienta les entraes.
Y ye que’l día nun pudo empezar meyor yá que coincidieron en fecha y espaciu, per un sitiu el Vibra Mahou Fest, y por otru’l partíu del Sporting, lo que fixo que dende antes d’entrar nel recintu pudiéremos vivir un ambientazu espectacular pela vera del Piles nun día llenu de bona música.
El tiempu acompañaba pa esti gran día y había munches ganes d’esfrutar de los terribles grupos qu’encabezaben el cartelu d’esta edición, que s’inauguró cola frescura d’Alberto&García, la estupenda banda solmenó’l polvu del escenariu colos cantares del so
últimu discu “La Herida” y tamién nos dexó escuchar el so postrer single “Lavar la ropa”.
La tarde acababa d’empezar y yera la vez de Rodrigo Cuevas. En Xixón tendríamos de añedir al calendariu de festexos una romería especial pal nuesu artista local, porque foi allucinante lo que pudimos vivir mientres esta actuación. Una verdadera fiesta que nos arimó a tolos que tuvimos la suerte d’entemecenos col cantante, en perfecta comunión col públicu, nes ocasiones onde se baxó del escenariu. Tenemos que facer una mención especial pa la dirección artística del númberu y pal cuerpu de baillarinos, que fixeron del show un momentu bien especial que fixo que se llevara una ovación terrible per parte de los asistentes.
Siloé foi’l siguiente grupu, y pillónos por sorpresa. Paecía que l’entamu d’esta actuación retrasábase pero lo que nun sabíamos yera que la verdadera actuación empezaba nel mediu del públicu, pos foi equí onde’l grupu vallisoletano tocó’l primer cantar del so primer
conciertu de la xira 2024, creando una atmósfera bien cercana que supieron caltener mientres tol conciertu, faciendo que la fiesta nun decayera. Lo mesmo asocedió con Samurai. Encantónos a los que pudimos ver per primer vegada en directu a la moza artista, que combinando les sos lletres intimistes y el so ritmu arrollador afaró col escenariu. Tres ella yera’l momentu de Carlos Sadness y de baxar les pulsaciones pa la traca final, y ye que siempres ye bien prestosa esfrutar del catalán en cualquier formatu y tastiar la guapura de les sos composiciones.
El públicu taba llistu pa recibir la descarga final. Fuerza, enerxía ya intensidá definen la barbaridá de conciertu qu’esplegaron los cartaxeneros Arde Bogotá, con un soníu brutal y non por ello faltu de calidá que retumbó en tol pabellón xuntu coles voces del públicu, totalmente apurríu a la causa.
Siguimos impresionaos col gran festival que pudimos ver en Xixón y cola calidá d’artistes, cantantes y Dj’s de los que pudimos esfrutar el pasáu sábadu. Una gran cita que ta coyendo tintes de clásicu nel calendariu musical asturianu.
