La Conseyería de Mediu Rural y Política Agraria presentó nel Conseyu de los Ecosistemes Acuáticos y de la Pesca n’Agües Continentales el borrador inicial de la norma que va regular la pesca fluvial el próximu añu, qu’incorpora un cupu por cuenca pa favorecer una práctica recreativa y sostenible.
La normativa caltien la llínea estratéxica aprobada en 2022, qu’apuesta pol caltenimientu de los ecosistemes, la ordenación piscícola y la sostenibilidá social y económico de la pesca continental.
El borrador inicial, al que se van incorporar delles propuestes plantegaes na xunta, inclúi cambeos nos cotos parciales, nos que la pesca llibre llindábase anguaño a los martes, miércoles y vienres. Pa 2024, va camudase’l vienres pol sábadu.
El testu tamién recueye la posibilidá d’ampliar la temporada en zones llibres. Col fin de compensar esa ampliación, camudóse la calificación de dellos tramos nes zones baxes de los ríos, que pasen a convertise en cotos tradicionales.
Medio Rural precisa que namás se podrá pescar un salmón por pescador y día, tanto na modalidá con o ensin muerte. Nel casu de la pesca con ninfa, va dexase una sola ninfa y un únicu anzuelu por caña.
Amás, establezse un cupu añal per ríu y un subcupu pa zones llibres, que supón un terciu del total, tal que se facía hasta agora na cuenca del Nalón – Narcea (cupu 240, subcupu 80). Esta modalidá estiéndese agora al restu de los ríos asturianos, cola siguiente distribución:
- Seya-Piloña (cupu 210 / subcupu 70).
- Cares-Deva (cupu 120 / subcupu 40).
- Esva (cupo 20).
- Eo (cupo 30).
