La nueva operativa de l’AVE, que va ser una realidá cola llegada de los trenes Avril a partir de marzu, va amenorgar tiempos, va ampliar frecuencies y va doblar el númberu de places de l’alta velocidá, lo que va suponer l’impulsu definitivu pa tresformar les infraestructures y la movilidá n’Asturies. Asina lo destacó’l conseyeru de Fomentu, Cooperación Local y Prevención de Quemes, Alejandro Calvo, na xunta que caltuvo con n’Uviéu col secretariu d’Estáu de Tresportes y Movilidá Sostenible, José Antonio Santano.
“Cola llegada de los trenes Avril – con billetes a la vienta dende’l 1 de marzu- tamos a les puertes de tener una nueva operativa que va amenorgar los tiempos de viaxe, va ampliar les frecuencies y va multiplicar el númberu de places de l’alta velocidá, aumentando asina la conectividad, l’accesibilidá y la competitividá d’Asturies, tantu pal tráficu de pasaxeros como de mercancíes”, valoró Calvo. Respetu a estes postreres, ta prevista una xornada de trabayu de la Mesa de Mercancíes primero que remate’l mes, na que va participar tamién el Ministeriu de Tresportes.
Na xunta celebrada güei, a la qu’asistieron tamién el viceconseyeru d’Infraestructures y Movilidá, Jorge García; la secretaria xeneral de Tresporte Terrestre, Marta Serrano, y la delegada del Gobiernu n’Asturies, Delia Llosa, revisáronse tolos asuntos en materia de movilidá ya infraestructures de titularidá estatal qu’afecten al Principáu. La variante de Payares constitúi la principal obra del corredor atlánticu na comunidá, que precisa que s’entaínen el restu d’inversiones y materialícese el plan director con plazos y actuaciones concretes pa convertir Asturies en polu loxísticu de referencia nel Arcu Atlánticu. Les prioridaes d’Asturies, tres la refundación de la Zalia, pasen pol desenvolvimientu, de forma conxunta, de la terminal intermodal Interzalia, pieza clave que conecta l’alta velocidá coles mercancíes; los puertos y la intermodalidá.
