La nueva residencia de mayores de Corvera va tener ocho módulos de convivencia n’edificaciones independientes, en caúna de les cuales van poder tar hasta 15 persones, yá que se van ufiertar en total 120 places. La directora xerente del ERA, Ana Suárez, ufiertó güei estos datos en visitando col alcalde del conceyu, Iván Fernández, la parcela na que se va construyir l’equipamientu.
El centru residencial va ocupar una superficie de 20.000 metros cuadraos que’l conceyu va ceder al gobiernu d’Asturies nel primer semestre d’anguaño. Amás, va disponer d’un aparcamientu de 5.000 metros cuadraos.
La xerente del ERA aseguró que la futura residencia “va ser el puntu de partida pal cambéu escontra’l nuevu modelu de cuidos de llarga duración” qu’impulsa la Conseyería de Derechos Sociales y Bienestar, yá que se trata del primer equipamientu que se va edificar teniendo en cuenta toles directrices recoyíes nesi nuevu marcu. “Esti ye un proyectu al llargu plazu y esperamos que tea operativu en 2027”, añedió.
Asina, según los plazos que remana l’Alministración autonómica, la cesión de los terrenes va concretar nel primer semestre del añu, mientres que nel segundu redactaráse’l proyectu, que se licitará en 2024. Les obres van executase mientres 2025 y 2026 y el centru va empezar a funcionar en 2027.
