El Principáu promociona énte la Organización del Tratáu del Atlánticu Norte (OTAN) el so modelu de desenvolvimientu tecnolóxicu na industria de la defensa coles mires de que pequeñes y medianes empreses puedan participar nel programa Diana (Defence Innovation Accelerator for the North Atlantic) de l’Alianza Atlántica, un acelerador de la innovación con aplicaciones en seguridá y defensa. El conseyeru de Ciencia, Industria y Empléu, Borja Sánchez, aconceyó col director del programa, Tom Dallas Mcsoerly, pa informa-y sobre les iniciatives que se desenvuelven na comunidá y afrontar posibles víes de collaboración.
Dallas Mcsoerly escoyó Asturies, la única comunidá que visita de forma oficial, pol interés qu’espierta como modelu de collaboración públicu-privada y pol potencial de les sos empreses innovadores amestaes al sector de defensa.
El programa Diana ta centráu n’acelerar la tresferencia de conocencia dende les empreses a la sociedá. “Ta mui enfocáu en daqué que nos interesa n’Asturies: les tecnoloxíes duales, esto ye, que tienen un usu pa la industria de defensa y pa la sociedá civil, que ye onde nos asitiemos va yá unos años col hub de defensa”, esplicó’l titular de Ciencia.
El conseyeru esplicó al representante de la OTAN les capacidaes de les compañíes asturianes nesti sector y l’interés por siguir ampliando’l desenvolvimientu de tecnoloxíes duales. “Representen una gran oportunidá dientro d’esta fola de reindustrialización que tamos viviendo n’Asturies y que va tener un efectu tractor na industria de la defensa y, sobre manera, na parte de tecnoloxíes duales acomuñaes a la producción actual o a la futura”, precisó.
