L’Asociación d’Axencies de Viaxes de Países Baxos (ANVR), principal agrupación turística d’estos territorios que cunta con más de 2.000 afiliaos, entama per primer vegada’l so congresu añal n’Asturies, por considerar la comunidá un exemplu de turismu sostenible, principal tema d’alderique del congresu.
La viceconseyera de Turismu, Lara Martínez, inauguró güei esti alcuentru, qu’axunta n’Uviéu a 200 representantes de la industria turística holandesa y que va analizar hasta’l domingu asuntos venceyaos cola sostenibilidá sol títulu Tradición en transición. Pa los organizadores “Asturies representa un claru exemplu, tanto de la transición escontra un turismu sostenible, como de la realidá d’una ufierta natural incomparable”.
Como amuesa del compromisu de la ANVR cola sostenibilidá, esta asociación va facer entrega, a la fin del congresu, d’un cheque donativu pal caltenimientu del osu pardu cantábricu.
El pasáu mes de febreru, la Sociedá Pública de Xestión y Promoción Turística y Cultural, en collaboración cola Oficina de Turismu en La Haya (Países Baxos), dependiente de Turespaña, presentó la candidatura pa celebrar n’Asturies el congresu añal de la principal asociación nacional holandesa d’axencies y turoperadores holandeses ANVR. Asturies foi escoyida ente destinos como Coruña, Córdoba o Turquía.
Asturies va ufiertar amás a los congresistes viaxes a Uviéu, Xixón, Avilés y Picos d’Europa, lo que va dexar que conozan de primer mano la ufierta turística de les ciudaes y paisaxes d’Asturies, tanto de turismu corporativu y de congresos, como d’ociu.
