L’Informe Museos y Centros d’Arte Español 2019-2023’ de l’asociación de Muyeres nes Artes Visuales (MAV) revela a Llaboral Centru d’Arte y Creación Industrial como un centru nel que la presencia de muyeres artistes nes sos esposiciones ye mayoritaria. Nos postreros cinco años, nueve de les quince esposiciones individuales que tuvieron llugar
en Llaboral fueron realizaes por artistes femenines. La investigación busca determinar si la programación de 93 museos y centros d’arte español suxetos al estudiu foi paritaria y «comprobar si cumplen coles directrices marcaes nel artículu 23 de la Lay Orgánica 3/2007 de 22 de marcu para la igualdá efectiva de muyeres y homes». El trabayu, presentáu a principios del mes de xunu de 2024, analiza les esposiciones individuales de los postreros cinco años, pero tamién tien en cuenta les colectives, refiriéndose al conxuntu de dambes como totales.
Cronolóxicamente, estrémense trés periodos nel análisis: xunetu de 2019 – xunetu de 2021, agostu de 2021 – agostu de 2022, setiembre de 2022 – setiembre de 2023. Nel casu de Llaboral Centru d’Arte, los porcentaxes de participación femenina nes esposiciones mientres los postreros cinco años superen el 35% tomáu como referencia na investigación pa delimitar la paridá o ausencia d’esta nes amueses ufiertaes polos museos y centros d’arte español. Concretamente, ente 2019 y 2021 el 75% de les esposiciones individuales fueron dedicaes a muyeres artistes; de 2021 a 2022 un 50%; y de 2022 a 2023 un 57%. La paridá caltiense si se tien en cuenta les obres d’autores presentes n’esposiciones colectives, siendo los porcentaxes: 48% pal primer tramu, 62% pal segundu y 49% pal terceru.
