Llaboral Cinemateca recibe esta selmana a la cineasta Celia Viada Caso, que va acudir el sábadu 13 de payares, a les 19:00 hores, al Paraninfo de la Llaboral pa presentar la so ópera prima La Calle del Agua, un documental que xira al rodiu de la figura de la pionera de la fotografía, l’asturiana Benjamina Miyar, y qu’algamó siete premios nel 58 Festival Internacional de Cine de Xixón (FICX), ente ellos meyor dirección, premiu del públicu y meyor guion de cine español.
En La Calle del Agua, Celia Viada fai un retatru de Benjamina Miyar, qu’usó la cára pa esplorar y caltener el mundu que l’arrodiaba. Esta fotógrafa llevó una vida poco común na so casa de la Cai del Agua y la so figura foi tapada pol franquismu pol so compromisu cola República. Foi torturada cuando tuvo en prisión y el resto de los díes vivió estigmatizada y na miseria, considerada la bruxa del pueblu. Tres la muerte, la mayor parte de les semeyes que conservaba na so casa remataron nel ríu y la so hestoria fundiéronse con elles nel escaezu.
Con aspectos qu’anden ente’l cine documental y esperimental, Viada retrata nesti llargometraxe l’alcuentru ente dos muyeres que comparten un mesmu llugar en distintos tiempos, nuna suerte d’esbozu d’un retratu qu’emerxe de lo recordao y de lo desvanecío.
